52avels Grammys – Beyoncé è la gronda victura
Il grammofon dad aur è il pli impurtant premi en la sparta musica, l'uschenumnà Oscar dal tun. E quel è vegnì surdà uss per la 52avla giada en 109 differentas categorias en tut las spartas musicalas.
- Beyoncé gudogna 6 Grammys
La gronda victura è cleramain la chantautura Beyoncé. Cun diesch nominaziuns e finalmain sis trofeas gudagnadas brigliescha ella encunter las concurrentas Madonna ni Britney Spears. Tranter auter ha ella gudagnà era la trofea per la meglra chanzun da l’onn.
Il meglier album da l’onn ha però gudagnà la giuvna chantautura da country Taylor Swift. Ses album cun il num “Fearless” ch’è vegnì cumprà gia passa 4.5 milliuns giadas, ha era gudagnà la trofea sco meglier album da country.
- Kings of Leon gudognan 3 trofeas
- Lady Gaga va a chasa cun 2 Grammys
Tar las bands han ils “Black Eyed Peas” pudì purtar a chasa trais grammofons d’aur. Tranter quels la trofea per il meglier album da pop. Sco meglier album da rock è vegnì premià il disc “21st century breakdown” da la gruppa "Green Day". Quai èra però era l’unic premi per els.
Betg mo ina, mabain gist trais trofeas ha gudagnà la gruppa “Kings of Leon”. La pli impurtanta era segir la trofea per la meglra registraziun. E quai per lur chanzun “Use somebody”.
Sco ultima artista cun pliras trofeas pon ins numnar “Lady Gaga”. Ella persvada oravant tut en la categoria “Dance”.
Cun ina versiun emoziunala en 3D da la chanzun “Earth Song” è il king of pop Michael Jackson vegnì onurà 7 mais suenter sia mort. El ha era survegnì post mortem in Grammy per sia ovra da vita.
