ARDefender – Defenda tia tur sin tes agen pult
Ina nova generaziun da giugar gieus è vegnì publitgà tar Playstation, X-Box e co. Giugar gieus senza controller cun agid da tes corp. Tar ils mezs mobils van ’ins però en in’autra direcziun. Giugar gieus cun involver il mund real.
- Il muster spezial
ARDefender as numna in pitschen gieu per l’iPhone ed auters telefons mobils che tira a niz la camera dal telefonin per fabritgar si il lieu d’acziun. Unic ch’ins sto far è ir sin la pagina uffiziala dal gieu, chargiar giu in fegl cun in muster spezial, squitschar ora el e metter il muster la nua ch’ins vul giugar.
Subit cur ch’ins cumenza a giugar analisescha la camera il plaz e chatta il muster. Sin quel cumpara immediat ina pitschna tur ed il plaschair sa cumenzar. Da tut las varts vegnan ussa pitschnas bumbas, tancs ni helicopters e vulan bumbardar tia tur. Ti sez has da defender quella e bumbardar enavos sin ils attatgaders.
Il genial vi da tut quella chaussa, ti sas mover il telefonin en tut las direcziuns, lunsch ni datiers, a sanestra ni dretga ed ils objects movan cun tai sco sch’els fissan propi sin tes pult, maisa ni curtin.
Il muster san’ins era squitschar ora en diversas grondezzas. Tut tenor quant grond ch’ins vul che la tur ed ils attatgaders duessan esser en il mund real.
