15. Champiunadis mundials en la disciplina “Air-Guitar”
Els siglian, rockan e maltractan lur ghitarra. Els squassan lur chavels lungs en il tact, porschan ina show immensa sin tribuna. Ma da lur ghitarra aud’ins gnanc ’in tun. E quai causa ch’els na possedan betg ina. Els èn participants dals champiunadis mundials da ghitarra d’aria, a Oulu en la Finlanda.
Ils proxims 4 dis ha lieu ils 15avels champiunadis mundials en Finlanda. Mintga participant sto accumpagnar in toc musica tschernì da la giuria cun lur “ghitarra d’aria”. Ils megliers as qualifitgeschan lura per il final, nua ch’els san sez tscherner ina chanzun e mussar lur talent. Ina giuria severa da 5 persunas decida lura a man da la prestaziun il nov champiun mundial.
Avant 15 onns ha Tapani Lauonen e ses collegas giu l’idea d’organisar in festival a Oulu. Tge sort festival era tuttina. Oulu n’è betg il center dal mund e là e mintga festival meglier che nagin festival.
A disposiziun vevan els mo 100 Euro. E pervi da quai levan els organisar insatge che na custa betg bler. E ghitarras d’aria na custan nagut. En il fratemp e daventà quest festival in d’ils pli gronds en la Finlanda dal nord. Mintga avust vegnan ghitarrists d’aria da tut il mund a Oulu.
- Günther Love: Champiun Mundial 2009
Tgi che craja, che ghitarrists d’aria èn mo in per spinners che squassan in zic la chavezza tar ina chanzun da AC/DC, quel è fallà. Tar ils champiunadis mundials van mo profis. Els èn champiuns en lur pajais, che prendan fitg serius lur musica. Ils participants vegnan da passa 20 naziuns: Australia, Nova Zelanda Giapun, USA e pli u main tut ils pajais europeics.
