10 onns dapli la mort dad Andy Hug
Oz, ils 24 avust avant diesch onns è mort Andy Hug cun mo 36 onns. El era ina icona e forsa il pli grond star da quel temp en la scena da Martial-Arts. E sia istorgia savess esser in script per in film da Hollywood. In’istorgia d’in mat ch’è creschì si en relaziuns povras e difficilas ed è daventà in idol ed in erox dal pievel en il Giapun.
- Andy (mittà) e ses fragliuns
Uffanza
Naschì è Andreas Hug ils 7 settember 1964 a Turitg. Ses bab era en la legiun estra ed è mort en Tailanda senza avair discurrì ina giada cun ses figl. Sia mamma era surdumandada cun l’educaziun dad el e da ses dus fragliuns, uschia ch’els èn creschids si tar lur tats. Andy s'ha pitgà bler sco uffant, ma quai s’ha midà d'andetg, cur ch’el ha cumenzà a trenar carate. Gia cun 15 onns era el part da la squadra naziunala ed ha gudagnà diversas concurrenzas. Cun 17 onns aveva el sia atgna scola da carate.
- Andy cun 17 onns...
- ...e gia cun ina collecziun da trofeas
- Trenament mintga di
- Champiunadi mundial da karate
Carate
Cun 21 onns ha el gudagnà ils campiunadis europeics da carate. Dus onns pli tard è lura reussì insatge incredibel. Andy Hug ha cuntanschì il final dals campiunadis mundials da carate ed è vegnì segund. Quai n’è anc mai reussì fin alura ad in betg Asiat. 5 onns pli tard fa el lura il pass decisiv per sia carriera infernala. El sa participescha puspè als campiunadis mundials ad Osaka e vegn sco emprim betg Asiat campiun mundial da carate. Sia persunalitad amiaivla e generusa aveva tutgà il gnerv da la populaziun dal Giapun ed il mitus Andy Hug è naschì.
- Il famus Andy-kick
- Emprim enscunter cun sia dunna Ilona
K-1
Grazia a l’iniziativa da Kazuyoshi Ishii è vegnì fundà il sport da cumbat K-1 cun Andy sco simbol per quest nov sport. Ed el ha surpassà las aspectativas ch’eran vegnidas messas. Il nov sport da cumbat ha chattà immediat in'immensa massa da fans en il Giapun.
Cun quest success è Andy turnà enavos en Svizra ed ha fundà la K-1 Night legendara da Turitg, nua ch’el ha er gudagnà ils proxims sis onns. Era il public svizzer ha finalmain reconuschì il sportist sco erox naziunal. Tgi che vegn en l’ester d’in di a l’auter ina persunalitad populara, na manca betg quest effect tar l’atgna populaziun.
- Ina legenda da K-1
- Cun ses figl Seya
- Curt avant sia mort
- Ils fans spetgan per condolar
La mort
La mort dad Andy Hug è vegnida nunspetgadamain e fitg spert. Ils 17 d'avust 2000 han ils medis scuvert leuchemia acuta tar el. Sis dis pli tard è el crudà en in coma e la populaziun ha udì per la prima giada da sia malsogna. Mo 22 uras pli tard han plirs organs disditg ed Andy Hug è mort. El ha laschà enavos sia dunna Ilona e ses figl Seya. In grond schoc per fans e famiglia.
En il Giapun è dada en la nova da la mort dad Andy Hug sco ina bumba. Reporters da sport han cumenzà a cridar davant la camera, la populaziun era schoccada.
Ses ultim plan da cumenzar ina carriera sco actur a Hollywood n’ha el betg pli pudì realisar. El resta però per adina en memoria tar tut ses fans. Anc ussa visita di per di glieud la pagina d’internet dad el e scrivan en il cudesch da giasts.
