Apple e ses misteris

Ils freaks da tecnica spetgan vess sin mesemna saira. Lura sa numnadamain l’entir mund sch' i dat in nov tablet-pc che revoluziunescha il mund da la tecnica. Apple ha numnadamain envidà ad ina preschentaziun da novs products. Tge che vegn propi preschentà è dentant in misteri.

: Forsa vesa el ora uschia... (sunrainet.com)

: ... u forsa uschia? (lorimgrant.com)

Speculà vegnì gia daditg en forums e blogs. Mo nagin na sa propi tge ch’il schef dad Apple, Steve Jobs, vegn propi a preschentar. Gia il settember passà eri vegnì speculà che Steve Jobs preschentia in computer multimedial cun in visur che reagescha, sch’ins al tutga cun la detta - in uschenumnà tablet-pc. Lezza giada eri dentant restà tar la fama.

Dapi l’entschatta da l’onn vulan adina dapli persunas aviar infurmaziuns dal nov product innovativ dad Apple. L’apparat innovativ cun il touchscreen duai probabel avair num iSlate e saja 25 sin 27,5 centimeters grond, scriva il “Wall Street Journal”.

: Il Newton dals onns 90

Betg l’emprima emprova
Ils ultims products innovativs da Cupertino en la California han persvas ils utilisaders, tant cun lur design, sco era cun la simpladad da lavurar cun els. Cun l’emprima emprova cun in tablet-pc n’era quai insumma betg stà il cas. L’apparat cun il num Newton che Apple aveva construì ils onns 90, n'ha mai gì il success giavischà. Ussa duai pia ina nova emprova cun in tablet-pc midar quai e duai revoluziunar danovamain il mund multimedial. I dat dentant era analists ch’èn da tut autr'opiniun. Perquai ch’il martgà saja gia plain cun netbooks, e-readers e smarthpones na vegnia in ulteriur notebook cun touchscreen stursch a revoluziunar il martgà, manegian quels. Tgi che ha raschun mussa l'avegnir. Enfin lura èsi d’avair pazienza e spetgar tge che Steve Jobs striuna ord dal chapè.