Peetu Piiroinen. Quai è il champiun dal 11avel Burton European a Laax. Suenter sia victoria en il slopestyle ha il giuven finlandais oz era gudagnà en la halfpipe cun in infernal terz percurs. Per el ha cumenzà l'onn nov fenomenal. Duas giadas terz a l'Oneill Evolution a Tavau è ussa duas victorias. Bod in pa surnatiral. Era la segunda plazza è ina surpraisa. Laari Ilkka-Eemeli, era da la Finlanda veva da prender la lunga via tras las prequalificaziuns e las qualificaziuns fin sin il podest. Sin terza plazza è il Svizzer Iouri Podladchikov. Il victur dal O'Neill Evolution en la halfpipe persvada cun il terz percurs la giuria. Mo els trais han survegnì sur 90 da 100 puncts pussibels.

Peetu Piiroinen gudogna il slopestyle sin Crap Son Gion cun in fulminant terz percurs. Lunsch guardava ora ch’il norvegiais Mikkel Bang piglia a chasa la victoria. Gia en l’emprim da trais percurs ha el mess avant ina nota da 92 or da 100 puncts pussibels.  Ma cun l’ultim percurs ha il svedais Piiroinen surpassà a Bang cun 93 puncts. In percurs pli u main perfect. Sin terza pusiziun è il norvegiais Gjermund Braaten. Tar ils svizzers n’è betg grategià uschè bain ils percurs. Christian Haller è sin pusiziun set, Iouri Podladtchikov sin pusiziun 9 e Stephan Maurer finescha sco 11avel.

I para che istorgia as repeta per Sina Candrian. Sco era l’onn passà riva ella era quest ’onn  puspè sin il podest en il slopestyle dal Burton European Open. La giuvna sursilvana sto mo far plazza a la finlandaisa Enni Rukajärvi che gudogna il slopestyle cleramain.

Sina Candrian e Tina Ramholt. Quai èn la duas Svizras che partan en final dal slopestyle e quai oz, ils 15 da schaner. Sina Candrian ha cuntanschì la segund meglra nota en ils mez finals. Mo la finlandaisa Enni Rukajärvi è stada in zic meglier. Las meglras otg èn or da set differentas naziuns. Mo la svizra sa porscher puspè ina giada plirs talents pel final.

Bunas novitads. 5 dals 16 finalists da la halfpipe èn Svizzers. Mo ils Finlandais han anc in participant dapli en la runda finala che ha lieu en sonda. Meglier sco tuts èra il giuven finlandais Laari Ilkka-Eemeli. Fin ussa anc betg in num uschè enconuschent, ma oz èra ses di. Tar ils Svizzers èn da la partida: Markus Keller, Christian Haller, Gian Simmen, Patrick Burgener e Iouri Podladtchikov. Nus essans mirveglius tge ch’els cuntanschan en sonda. 

Il mez final dal slopestyle dals umens è finì. E sut ils megliers 16 èn era trais Svizzers. Iouri Podladtchikov da Turitg, Christian Haller da Zernez e Stephan Maurer da Zizers cumbattan en venderdi per la victoria ensemen cun 13 auters finalists da tut il mund. Las cundiziuns n’eran betg las optimalas. Oravant tut da stimar gist las distanzas è difficil cun trid’aura.

Mumentan stattan las qualificaziuns sin il program. Snowboardists da tut il mund ston cumbatter per insumma cuntanscher ils mezfinals, nua ch’els inscuntran sin l’elita. Quella vegn envidada ed è sa qualifitgada automaticamain. Tut las concurrenzas da Burton funcziunan tenor il medem princip, la differenza è mo tar il dumber da participants. Per declerar in zic pli exact sco che la selecziun funcziuna, prendain nus l’exempel vi da la concurrenza da la halfpipe dals umens.

En ils mezfinals inscuntran els per l’emprima giada ils curridurs envidads, pia quels ch’èn gia sa qualifitgads automaticamain. Davent da las prequalificaziuns fin e cun ils mezfinals ha mintga participant adina duas schanzas da persvader la giuria. Be il meglier dals dus percurs quinta. In’ultima giada vegn decis tgi che vegn enavant. Per il final pon ils 16 megliers curridurs sa qualifitgar. E là vegn lura decis, tgi che gudogna ils 15’000 $ ed ils 1000 puncts per la cuppa TTR.

 Dapli impreschiuns en nossa galaria

La meglra show en l’Europa. Uschè sa preschenta il Burton European Open (BEO) a Laax per la 11avla giada. Quest onn sut il motto “Circus”. Mo dus dis suenter ils ultims finals dal O’Neill Evolution a Tavau cuntinuescha il circus dal mund da snowboard. Cun passa 468 participants è quai il pli grond event da snowboard en l’Europa.

Medem standard sco a Tavau

Era a Laax èn las disciplinas il slopestyle e la halfpipe. E las 6 stailas da la TTR empermettan puspè il pli aut nivel da concurrenza tranter ils participants.

Atgnamain cumenzan ils Burton European Open a Laax gia la fin d’emna avant. E quai cun las concurrenzas per ils juniors. Mats e mattas tranter 9 e 14 onns pon gudagnar la trofea “Junior Champ”. E medaglias han gudagnà era dus giuvens svizzers. David Hablützel da Zumikon gudogna il slopestyle dals mats ed sa plazzescha sin posiziun 3 en la halfpipe. Tar las mattas vegn Ramona Petrig da Trachslau segunda en il percurs dal slopestyle. La pli giuvna participanta è Chloe Kim dals Stadis Unids cun mo 9 onns. Ella gudogna en la halfpipe, vegn terza en il slopestyle ed è l’unica da las junioras che mussa in frontflip durant ses percurs.