Bloc Party: La fin da l'intimitad
Kele Okereke, il chantadur e chau da la band englaisa Bloc Party para dad esser in um da las cuntradicziuns. En in’intervista cul magazin “Musikexpress” ha el intunà che la furma dal album da musica sco tala saja impurtanta, ch’el sez na taidlia però betg pli albums entirs. En la medema intervista ha Kele Okereke ditg, ch'in album saja per el ina collecziuns da chanzuns che furman ensemen in’istorgia. Ma tar ses agen album “Intimacy” metta el l’entschatta da l’istorgia a la fin. La chanzun “Ion Square” ch’è la davosa sin l’”Intimacy” fisic, avess da star al cumenzament, perquai che cun “Ion Square” cumenza tut:
Tadlar in toc da "Ion Square"...
Ion Square è ina plazza publica en il ost da Londra nua che Kele Okereke viva. Là saja el sesì ina giada la notg suenter la sortida sin in banc, in pau sturn è fitg inamurà, ha Kele Okereke declerà al magazin da musica australian “Time Off” da nua che l’inspiraziun per la chanzun saja vegnida. En “Ion Square” raquinta Kele Okereke dal cumenzament da l’intimitad “Intimacy” e metta la chanzun tuttina a la fin da l’album. Forsa che quai ha in motiv musical, “Ion Square” è in dals tocs ils pli plauns. En ils tocs pli dirs e pli sperts raquinta lura “Intimacy” insatge auter. Auter che tar “Ion Square” na vai betg per l’entschatta dad in’amur. “Intimacy” raquinta l’istorgia da las fins dad amurs, relaziuns ed intimitads.
Cun “Intimacy” preschenta Kele Okereke in album cun texts fitg persunals, texts che laschan sminar che Kele Okereke s’interessa per l’amur e per la mitologia grecca. Adina puspè fa el allusiun a questa, uschia per exempel tar l’emprima chanzun dal album “Ares”. “Ares” è en la mitologia grecca il Dieu da la guerra e per guerra vai era en la chanzun:
La chanzun “Ares” pon ins era chapir sco chanzun politica. La guerra politica u la guerra persunala, ch’i po dar sch’ina relaziun va a fin. Uschia dovra Kele Okereke la mitologia grecca era sch’i va per l’amur. “Trojan Horse” è in ulteriur exempel:
Tadlar in toc da "Trojan Horse"...
Entant che “Trojan Horse” raquinta da la dischillusiun d’ in’amur passada - in chaval trojan che fa finta dad esser in regal e sa mussa a la fin sco insatge nausch - raquinta “Signs” da la fin d’ina vita.
Ils segns na stattan betg bain – ed ils planets influenzeschan quai. Il Mercur è en retrograd “My Mercury’s in retrograde” chanta Kele Okereke e quai vul dir, che quai n’è betg il temp da cumenzar insatge nov. Cunzunt nagina nov’amur...
“Mercury” è forsa la chanzun la pli spectaculara sin “Intimacy” ed ella mussa la veglia dad experimentar da Bloc Party. U sco che Kele Okereke ha ditg al Magazin "Musikexpress"; i sto adina ir vinavant, el na vul gnanc cuntentar las aspectativas da la glieud, ma be sias atgnas – quellas da betg star eri. Uschè admira el sez ad artists che sviluppan vinavant lur stil, sco Blur e Björk e natiralmain Radiohead. Quests n’èn betg mo idols pervi da lur stil da musica ma era pervi da lur nova moda da publitgar musica. Sco Radiohead ha era Bloc Party dà ora l’album l’emprim per chargiar giu per paucs raps e l’atun 2008 lura en furma fisica.
Forsa che Kele Okereke è a la fin tuttina in uman consequent: “Intimacy” è in’ovra cumpletta en sia furma fisica. Text, musica e booklet fan l’istorgia, ina bell’istorgia da la fin al cumenzament d’in’amur, in'istorgia che raquinta da dispita e da guerra. In album – in’istorgia, ch’è auter sco tar ses idols Björk e Radiohead pli simpla dad interpretar.
Text: Chatrina Josty
Fotografias: Flickr.com. Fotograf: AJ (Bloc Party Live in Fredericton Canada)
