Equipaus cun velo, natel, laptop ed ina dimora hai jeu fatg
Tel Aviv duront miez onn tier miu liug da habitar.
Inaga il meins partgel cheu mias experientschas cun vus.
Donat Caduff (27)
Tel Aviv 15-05-2009
Cars marveglius,
grev da declarar daco ch'ins sedecida dad ir a Tel Aviv. Aber sil pli tard cura ch'ins viseta quei marcau san ins ei. Sesenta tgunsch regurdaus vida Berlin ni Barcelona. Tel Aviv ei in carmalont mix da quels dus, – na, forsa gest da tut ils marcaus ch'ins ha gia visitau inaga.
La allea da Rothschild ei sco las Champs Elysées. Cun tut ses bauns, kiosks, plontas odurusas e plazzas da giug eis ella forsa buca meins scharmanta che igl original. Alla riva dalla mar ves'ins sablun, bars, hotels e promenadas che aulzan considerablamein il Rimini-factur sco era ils tscheins-casa. La fiera da Karmel ei populada dil marcadem dils Arabs, dil fried da spezarias e da pèschs che carmala gats selvadis.
Puspei diltuttafatg western lifestyle ei la via da Sheinkin, fullanada cun stizuns da resti e calzers. Gie, las vias: Stupadas cun da tuttas sorts vehichels, naven da Land Rovers dall'UNO tochen Isuzus veglianders dils Arabs. E sils trottuars trotteschan ils fashionistas cun tastgas plein resti en in maun e vida tschel l'amitga cun levzas bunamein schi grossas sco las tastgas.
Inagada hai giu avunda da tut quei menaschi. Jeu sun ius cugl ascensur sum il Shalom Tower. Il Shalom Tower ei aults sco in pèr clutgers-baselgia e lubescha ina magnifica vesta sur la metropola. Viu haiel jeu cunzun casas naturalmein, massa casas cun tetgs plats. E tut quels tetgs han in motiv daco ch'els ein plats: per far party sut tschiel aviert e contemplar il tschiel nocturn che ei ners sur la mar e violets sur il marcau.
Jeu sun staus invitaus inaga a sch'ina open air party, amiez in quartier da habitar. La musica mava tochen l'ina. Ed ils vischins? Neginas reclamaziuns. Insumma party. En sortida vala la regla: Avon mesanotg buc ord casa. Itay, miu conhabitont, entscheiva lu era bugen il di las duas il suentermiezdi ni schia. E siu caracter ruasseivel e controllau lai buca gest supponer ch'el fuss in grond rumpa-sughets da partys.
Enteifer Israel ei Tel Aviv enzatgei sco ina zollfreie Zone per quels che s'interesseschan buca per uiaras e politica, mobein che vulan mo guder la veta. Sch'ins spetga da mesanotg al stan da magliar sin siu falafel statt'ins bein pusseivel en retscha cun zatgi che pertgira il di ora x in checkpoint si ella Westbank. Ni che meina eroplans sur il Gaza. En mintga cass ha quel uss era mo fom, e sch'el ei buca memia staunchels vegn el silsuenter a far ina brava festegiada. Siu sabbat vegn lu ad esser unfrius alla sien.
Far fiasta era aber buca miu emprem motiv da secasar per miez onn a Tel Aviv. Era buc Erasmus, Human Rights Watch ni in kibbuz han carmalau mei giucheu. Mobein las marveglias vid in marcau ch'jeu enconuschevel aunc gnanc, las temperaturas migeivlas, la mar, il mix da culturas. E, clar, lavur emprovel jeu era d'anflar cheu, quei ei aber buca gest sempel sche ins ei primo graficher digl exteriur che, secundo, sefa buc en cura ch'el tegn in prospect ella scartira hebraica sil tgau.
Also, jeu stoi emprender uss empau hebraic e tarmettel in car shalom a vus tuts
Donat
