Equipaus cun velo, natel, laptop ed ina dimora hai jeu fatg
Tel Aviv duront miez onn tier miu liug da habitar.
Inaga il meins partgel cheu mias experientschas cun vus.

Donat Caduff (27)

Tel Aviv 15-06-09

Also caras e cars,  

dacuort puspei haiel giu fom, ed haver fom cheu a Tel Aviv va ni grond els raps ni stat sil magun, da magliar delizius porscha numnadamein mintgin, il Gediu, il Marocan, la Russa, il Filipin, insumma tuts.
Quella ga hai giu gust dil Take-away el Carmel, ella fiera nua ch'ils Arabs vendan da tutta sort rauba frestga, pèschs e paun e legums denter gats selvadis e rugadurs che dierman giunplaun.
Il Take-away scheva ir musica, also buca musica tipica orientala, mobein da quei cun in tec dapli beat, house, per far il chillen en quella atmosfera hectica. Forsa schevani era ir house per sedistaccar empau dil clische arab, per esser in tec pli poshs che tschels stans ella fiera e plidentar in publicum pli giuvenil.

En mintga cass haiel jeu spitgau cun premura mia pita cun hamburgers, tschaguolas barsadas, salata e coriander. Ed enten spitgar haiel jeu observau il vendider che possedeva in stan da legums vis-a-vis. Quel, also il stan, era pulstraus cun peterschin, basilicum, carflur, por, salata, il meglier da quei che vegn ord la tiara e fa verd.
Il vendider era maghers ed haveva cavels tschuors, spontanamein ei Moe vegnius endamen a mi, quel che ha l'ustria tiels Simpsons, in tec Aschiss, aber tgei vulans. Per carmalar la glieud clamav'el. Sch'el fuss staus Svizzer clamav'el suenter francs, cunquei ch'el era Israeli clamav'el suenter schekels.
El era buca pustaus davos sia teca, na, el cafergnava per siu stan entuorn, cun gronda premura, ha mess cheu in fasch peterschin ella dretga posiziun, ha sortau ora leu ina salata marscha. Ed incuntin clamav'el suenter schekels si per ses legums, devozius e conspiront, sco sch'ils legums semidassen da sez en schekels. Atgnamein clamav'el buc, mobein stuschava sias supplicas tras ils dents, el fimava numnadamein ina cigaretta.
Fimar e vender victualias en ina, quei va gie gnanc! – aber ei va. Quei va aschi bein sco exponer sutgas pulstradas amiez via, sco ei fan el Neve Shanan, il quatier african, era sche quellas vegnan tschuffas dalla puorla dil traffic e lur textura ruha dil sulegl. Zatgi cumpra adina.
Il mund funcziunescha era senza perscripziuns da higiena e labels da qualitad dapertutenavon e per mintgin, e da veser quei fa bein.

Basta, aschia benedeva il negoziant ses legums culla tschendra da sia cigaretta e cun sias oraziuns. Cu siu altar era inaga en uorden, midav'el ritual. El prendeva plaz sin sia sutga da plastic, prendeva in fasch por enta mauns e teneva vi quel allas passantas sco in muronz in matg fluras. Jeu udevel schon a clamar el I LOVE YOU, aber naturalmein clamav'el SCHEKEL SCHEKEL RABA SCHEKEL. Sereteneva la passanta empauet, era il fasch por schon setschentaus el canaster da cumissiuns, e cheutras saveva la clienta era tgei cuschinar per zera e pagava obedeivlamein.

Omisdus pia cuntents, ed jeu dil rest era, mia pita era el fratemps gia promts. Senza restonzas da tubac notabene. Gustau hai buontad.  

Bien appetit – bete avon – era a vus,

Donat