Equipaus cun velo, natel, laptop ed ina dimora hai jeu fatg
Tel Aviv duront miez onn tier miu liug da habitar.
Inaga il meins partgel cheu mias experientschas cun vus.

Donat Caduff (27)

Tel Aviv, 15-07-09

Caras lecturas, cars lecturs,  

ussa sun jeu pia anavos ord mias vacanzas da stad en Svizra, cuortas vacanzas, in'jamna, freid e bletsch plitost, e puspei da retuorn ella Tiara empermessa, empermessa dad instanzas divinas a tons cussadents dapi Abraham, mintgin che vegn giucheu capescha daco, ina tiara fritgeivla e migeivla dalla quala era jeu haiel schau reservar in tac per mei. Pli precis: Quels dis hai jeu bardigliau en mia nova habitaziun ella Eiger tier Uri.

Tgei che tuna schi svizzer sesanfla nigliu auter ch'el quartier pli pauper a Tel Aviv, leu nua ch'ils immigrants dall'Africa pendan entuorn en camischas da basket ed ein ners sco Michael Jordan, han denton scret si dies stagl lez num caussas sco "Guantanamo". Ellas ustrias sesan ils alcoholichers dil quartier, e l'odur da lur fanas semischeida cun quella dils legums dils stans da fiera ch'ein diesch ga pli bienmarcau che quels dil Volg e pli frestgs gnanc tgisà. Ils rumians vegnan camiunai naven buca mo ina ga l'jamna, mobein gest mintga damaun aschia che ins sesenta cheu mo bunamein, aber buca diltuttafatg sco a Napoli.  

La Eiger ei pia ina via en quei quartier starschliu, buca numnada suenter la muntogna Bernesa, mobein suenter x in schef-rabi permiert haiel fatg da saver, ed Uri ei il student da filosofia che ha schau vi a mi sia habitaziun per zacons meins. Habitaziuns a Tel Aviv ein caras sco a Turitg, aber ruosnas. Tgei che vegn numnau "schubergiau" alla surdada cuntegn tgunsch hosps cun dapli che quater combas. La puorla sesa sin tut las surfatschas horizontalas sco sems, boxas da musica, nuvs, fallas-esch, crunas-cudischs, ed ei para empau scuril ch'enzatgi sa leger Hegel, Heidegger e Nietzsche denter finiastras ruttas ed installaziuns da ruina. Las taccas sillas finiastras vulan dar da crer ch'ins vivi cheu en ina zona da monsun, ed enstagl plov'ei cheu sil pli igl unviern zacontas ga. E la tgigiera dil min... na, quei spargnel a vus, forsa essas gie grad vid ils cornflakes dalla damaun.
Emprem ha ei pia dau ina schubergiada da camifo, il niveau da cacherlacas che jeu hai entupau ei sesalzaus sin quel da furmiclas che prefereschan gie plitost il higienic, e, beinbein, ei selai viver cheu detg cumadeivel.  

Dil rest: nua che Uri ei? El lai dar l'aura pils larischs ell'Engiadina bassa.   Basta, jeu prefereschel vinavon las temperaturas tropicas e tarmettel in car salid,

Donat