Equipaus cun velo, natel, laptop ed ina dimora hai jeu fatg
Tel Aviv duront miez onn tier miu liug da habitar.
Inaga il meins partgel cheu mias experientschas cun vus.

Donat Caduff (27)

Tel Aviv, 18-08-09

Mintgaton, preziada lectura e preziau lectur,

mintgaton sededestel jeu amiez la notg, bugnaus digl agen suadetsch. Jeu sededestel perquei che jeu siemiel nauschas caussas, sco per exempel: In aviun schula sin mia casa. Quei buca senza raschun, jeu vivel ella flugschneisa da Tel Aviv, quasi il Züriberg da Tel Aviv, aber ussa buca metti avon il Züriberg, s'imaginei plitost la Langstrasse, ni, aunc meglier, in toc Africa importada ad Israel. Jeu patratgel lu aber era vid autras nauschas caussas. Per exempel co carmalar voss'attenziun ella proxima brev a battaporta, co engular a vus il mument denter strihar vossa pischutta e scriver sin facebook che vus strehies vossa pischutta.

Fagend quels patratgs manegel lu da veser sin miu handy, miez aunc el siemi, la numera dil redactur si Cuera che scalina e vul miu proxim text silla damaun, e quei schegie che miu mobil israelian sa gnanc mussar sil display numeras svizras, in dils tipics sbagls dramaturgics che siemis han la disa dad haver, che fan aber tuttina snavurs. Aber lu vegn schon in secund schub suadetsch. Lu realiseschel numnadamein che jeu sai strusch raquintar rauba aschi spectaculara sco quei che nus tuts havein sowieso schon viu duront nossas vacanzas da meditaziun ell'India ni sil trip da töff tras la Sahara.

Okay, scutina lu sensationslüstern miu miez-aunghel-miez-giavel ell'ureglia, aber dat ei a Tel Aviv buca silmeins uiara e terror? Na, dat ei ual ussa buca, rispundel jeu, e per veser da quei sundel gie era buca vegnius giucheu. Jeu vi plitost pretender che Tel Aviv sa esser lungurus. Fetg lungurus, schizun schi lungurus ch'ins sa star in entir di semplamein aschia mo en casa. Aber igl ei in bi lungurus, era in tec in blöd forsa, in lungurus che surmeina ins da quitar detg divertent quels schlaghers ch'igl African suna cun dus dets sil keyboard alla mar. La liunguriala sa era surmenar ins silla velotour tras las vias vitas dil Sabbat da prender la medema via ensi ed anavos per vegnir medem brins sin omisduas varts. Ed igl ei la medema simpatica moda da liungariala che retscheiva tei en bratscha fidada turnond d'in viadi si Jerusalem cun siu sogn traffichem da turists, terrorists e pelegrins, ni digl ocean metallic dalla Mar morta en sia cuntrada lunara.

Lu vegns anavos a Tel Aviv, ella civilisaziun, el mund senza misteris e conspiraziuns, vas el proxim kebap nua ch'ei laian ir rauba sco Glory Box da Portishead, ed ei fa bein. Silmeins tochen alla proxima notg nua che vegns tuttenina neunavon tut bletschs.

Donat