Equipaus cun velo, natel, laptop ed ina dimora hai jeu fatg
Tel Aviv duront miez onn tier miu liug da habitar.
Inaga il meins partgel cheu mias experientschas cun vus.

Donat Caduff (27)

Tel Aviv, 17-09-09

Preziada lectura, preziau lectur,

Oz haiel priu avon da far caussas che jeu vegnel strusch a far en Svizra. Ed jeu tuornel en Svizra baul, memia baul schess jeu, en duas jamnas gia. Ussa san ins dir: moment – duas jamnas. Quei ei in liung temps per quel che dumbra mintga minuta en quellas duas jamnas, e sch'ins porscha la performance maximala duront quei temps e quei en mintga situaziun dalla veta, ella lavur, el temps liber, el sex, lu emplenessan ins cun duas jamnas luc in pèr toms d'ina biografia.
Aber quels denter nus che fan da temps en temps retrospectivas per tementar sesez e miran tgei ch'els han prestau existenzialmein lur quitordisch dis vargai, quels han gia daditg fatg flucs cun talas illusiuns: da 2 jamnas san ins spitgar nuot, il pli pauc dad ins sez. Jeu sai, quei tuna ussa sco in dad 80 onns che ha viu gia tut en sia veta. Aber schi lunsch sun jeu gie gnanc, e perquei sesel ussa cheu sil letg, sin schanuglia il laptop, sper mei il gat e sur il gat il cabel dil laptop, ed jeu studegel co dar a mi ina last and unique Tel Aviv experience. Also.

Jeu mon segir inaga: Sin fiera a cumprar limonas e menta, per far ina buna limonada cun glatsch e massa zucher. E lu in segl ella mar. Empau aua da sal fa bein e fa ch'ins sesenta 27 onns pli giuvens, pia sco nievnaschius. Strusch seschigentaus, mondel a beiber in cun Guy che ei vegnius bab quels dis, e lu cun miu vischin Yariv che ha stuiu schar ir siu bab quels dis, survivent dad Auschwitz ed ussa sedisgraziaus sin via. Tschei vischin, il Tal, vegnel buc a veser pli.

Tal han ins num a Tel Aviv. Ni: Ofer, Uri, Ari. Fantastics nums sco d'in auter planet. Tal ei seradunaus oz en Georgia per far trekking. El spetga ussa silla plazza aviatica ed jeu studegel ora mia proxima posiziun sin mia to-do-gliesta: forsa ir cun taxi e marcadar il prezi empermiez. Schar menar mei tier il sulet coiffeur sin quest mund che discuora buca plaid (el ei analfabet engles ed jeu analfabet hebraic). Lu mon jeu tier il garaschist. Buca che jeu havess in auto che ei ius empaglia, jeu hai gie gnanc in entir. Il garaschist ei ina hospiteivla persuna che jeu hai entupau tschella notg a fotografond las vias, ed el era vida fravagar aunc tard.
Sez buca gediu, eis el forsa buc il pli grond amitg dils Israelis, e per l'emprema ga en mia veta ha miu confess dad esser catolics gidau da gudignar simpatias. Il garaschist ei numnadamein muslim israeli e siu collega gediu iraki. Complicadas denominaziuns, sempla glieud. – Gie, tut quei vegnel a far. Jeu sai, quei ein biars giavischs. In must dat ei aber aunc: ir vi el Neve Tsedek. Leu dat ei super gelati. Jeu vi bunamein gir schi buns sco quels ell'Italia.

Ha quei tut plaz en in gi? En duas jamnas? Jeu spetgel nuot, entscheivel inaga. En mintga cass – bugen en Svizra puspei:
vies Don Shalom