PUNTS: Chattar in chau en temps da crisa

Silvana Derungs, ch’è stada durant dus onns chauredactura da la gasetta giuvna Punts dat giu sia carica sin l’atun dal 2009. Per manar vinavant la gasetta tschertg’ins in nov chauredactur. Il nov chauredactur u la nova chauredactura da las Punts surprenda la gasetta en in temp da crisa, ina crisa che sa manifestescha era tar la gasetta giuvna.

“Ils daners tanschan anc per duas ediziuns”, di Silvana Derungs, la chauredactura partenta.
Il 2009 na datti perquai pli probabel betg 12 ediziuns co ils auters onns. “Las instituziuns dattan uss mo pli raps a quels projects che correspundan propi 100% a lur filosofia da sustegnair e là crodan las Punts magari davent.”

La suprastanza da la GiuRu, l'uniun "giuventetgna rumantscha" ch’edescha las Punts, saja londervi da tschertgar ina soluziun.

Ina varianta per spargnar raps han ’ins gia empruvà cun l’ediziun actuala “crisa” che cumpara sco document PDF sin la pagina d’internet da las Punts.
Sche quai è ina soluziun per l’avegnir n’è tenor Silvana Derungs anc betg cler e dependa era da la persuna che surprenda la gasetta sin l’entschatta october u il pli tard l’entschatta dal 2010.