Il misteri dal dat da Rubik è scuvrì
30 onns datti gia el, il giugaret ch’è vegnì vendì il pli bler. E punctualmain sin il giubileum han scienziads scuvrì il grond misteri dal dat da “Rubik”. Quants moviments dovr’ins maximal per schliar el. E quai maximal 20.
L’architect da l’Ungaria Erno Rubik ha inventà il dat dal 1980. La finamira da quel è, da rablar mintga vart en la medema colur. Rubik ha sviluppà quel per ses students, cun l’intenziun da sviluppar lur imaginaziun spaziala. Il dat s’ha però svelt sviluppà en in giugaret da cult. Passa 450 milliuns tocs èn gia vegnids vendids.
Oz datti anc bleras alternativas che sa basan sin l’idea da Rubik, i dat schizunt masteranzas mundialas, nua ch’ils participants ston schliar il dat il pli spert pussaivel.
Gia dapi l’invenziun da quest dat han scienziads empruvà da calcular cun quants different moviments ch’ins po schliar en mintga cas il dat. Pir ussa, e cun l’agid d’in super-computer da Google han els savì far il quint. Las 43'252'003'274'489'856'000 (43 trilliuns) differentas pussibilitads èn vegnidas testadas dal computer. In computer normal avess duvrà per quest quint ferm 35 onns.
En congual: Il record mundial per schliar il dat da Rubik è pel mument tar 7,08 secundas, e quai senza il computer.
