La giuventetgna da Cuira sa dosta
Dapi l’onn 2008 datti a Cuira la lescha da polizia la pli severa. Quella scumonda da baiver u mangiar sin plazs publics da notg, lubescha da montar cameras en lieus publics e tranter auter era in’ura da polizia. La giuventetgna sa dosta ussa encunter questa lescha.
Il venderdi saira, ils 11 da matg è stada a Cuira, sin la “Quaderwiese” ina demonstraziun encunter la lescha da polizia.
Hannes Barfuss, chantadur ed organisatur da la demonstraziun ha scrit ina chanzun sur da la situaziun e la malcuntentientscha da la giuventetgna. La chanzun vegn schizunt numnada l’imni dal moviment a Cuira.
