Drogas ord l’ureglier
Ina nova droga fatschenta tuttina ferm la giuventetgna sco era experts encunter drogas. I-Doser è ina droga en furma da tuns. Ina droga che vegn consumada atras l’ureglier. Tgi che metti si l’ureglier e taidla ditg avunda quels tuns vegni en extasa tuttina sco cun drogas fermas, pon ins leger en forums.
Quai cun uschenumnads tuns binaurals. Ord l’ureglier tunan differentas frequenzas sin l’ureglia dretga e la sanestra. En il tscharvè fusiuneschan quellas frequenzas entant ch’il tun vegn recepì sco plirs tuns. Quai po lura chaschunar insatge sco in cirquit curt ed uschia manar tar extasas.Tuns binaurals èn dentant nagut nov. Gia 1839 scuvra Heinrich Wilhelm Dove quai fenomen dals tuns pulsads. Ed avant var 40 onns èn quels tuns vegnids duvrads per l’emprima giada per meds medicinals. Ozendi dentant simpel da telechargiar ord l’internet.
“Entiras gruppas da giuvenils van sin talas paginas per empruvar la reacziun”, crititgescha Mark Woodward dal “Oklahoma Bureau of Narcotics and Dangerous Drugs” tar il portal da novitads american, NewsOn6. E vairamain, sin youtube chatt’ins ina pluna da films cun giuvenils vid consumar la droga digitala.
Dispitaivel è quant ferm che quellas drogas pon midar il tscharvè. Sco il Richard Blätter da l’Associaziun professiunala dependenzas ha detg al Tagesanzeiger maina ina dependenza tar midaments en il tscharvè. La dumonda saja davent da cura che quels midaments pon far donn. Las drogas digitals persuenter taxescha l’expert per nunprivlusas. “ Musica midi il tscharvè dentant plitost positiv”. Mo drogas restan drogas e tadlar dad aud tuns curius sur lung temps fa segir era betg bain a las ureglias.
