King of Rock ’n’ Roll survegniss 75

Sch’el vivess, lura pudess el festivar ils 8 da schaner ses 75avel anniversari. El, il King of Rock and Roll, Elvis Aron Presley. Ils 8 da schaner 1935 è Elvis naschì en ils Stadis Unids a Tupelo Mississippi. Ils 42 onns ch’el ha vivì, ha il King registrà plunas chanzuns.

Sa regurdar dad Elvis
Arturo Casanova è stà ed è anc adina in grond fan dad Elvis. Il musicist n’ha betg mo tadlà la musica dal King, mabain el chanta era ella e divertescha cun quella musica blera glieud.

Paucas infurmaziuns privatas
L’onn 1977 è Elvis Presley mort cun mo 42 onns. Uffizialmain vegn declerà ch’Elvis saja mort pervi d’in infarct dal cor. Probabel ha il consum da drogas manà a la mort. Laschà enavos ha el, sper sia musica, pauc che gidas a far in maletg dad el. Brevs ha el scrit paucas, las intervistas èn stadas raras e las conferenzas da medias n’han era mai dà la chaschun da manar discurs pli profunds. Dumondas davart sia vita privata ha el adina refusà curtaschaivlamain.

Per ils ins viv’el anc adina
Gia curt suenter la mort d’Elvis cursava la fama ch’il King vivia anc. Ses segund num Aron saja scrit sin sia fossa cun dus “A”. Quai è in dals fatgs che rinforza la teoria da tschertas gruppas da glieud, ch’Elvis vivi anc. Sin la pagina uffiziala dad Elvis vegn declerà ch’el haja midà ses segund num curt avant sia mort dad Aron sin Aaron.

Bleras famas vegnan derasadas
I dat era differents auturs ch’èn s’occupads en lur cudeschs cun la mort d’Elvis Presley. Els pretendan d’avair chattà indizis che laschan dubitar ch’il King of Rock ‘n’ Roll saja mort. Ils auturs vegnan pli u main tar la medema conclusiun. Elvis saja daventà pli u main voluntari l’unfrenda d’in program da protecziun per perditgas principalas dal FBI. In dals auturs è vegnì suenter lungas retschertgas els archivs statals dals Stadis Unids tar la conclusiun ch’Elvis saja stà entretschà en ina da las pli grondas inquisiziuns dal FBI. Elvis havess, tenor quai autur, gì da dar perditga en in process cunter las pli pussantas famiglias da la Mafia.

I na dat nagins mussaments
La teoria, ch’Elvis viva, è lura era adina puspè vegnida stgaudada entras persunas che pretendan ch’ellas hajan vis Elvis suenter sia mort. Enfin ussa ha dentant nagin pudì confermar cun fatgs credibels quellas legendas, tesas e teorias. Era la famiglia ed enconuschents d’Elvis Presley han adina puspè dementì questas pretensiuns.

Ulteriuras infurmaziuns davart Elvis Presley chattas era tar indiepedia.de.