Marko Grilc da la Slovenia, il victur dal Air & Style 2009, gudogna a Tavau il slopestyle. Ses emprim percurs persvada gia la giuria cun 93.5. Segund vegn Ville Paumola da la Finlandia e terz è ses cumpatriot Peetu Piiroinen che ha era gudagnà la medalia da bronze en la halfpipe. Meglier Svizzer è Mathieu Schaer sco 11avel. Ils O'Neill Evolution 2010 èn finids, ma proxim'emna cumenzan gia ils Burton European Open a Laax.

Iouri Podladtchikov gudogna la concurrenza en la halfpipe avant ses cumpatriot Markus Keller. Cun 91.33 puncts ha el surpassà en l’ultim da trais percurs tuts. Il highlight dal percurs era segir il Double Cork 1080 che Iouri ha fatg perfetg. Sin terza plazza è il Finlandais Peetu Piiroinen. Christian Haller ha era cuntanschì in bun resultat e s’ha plazzà 6avel.

Las qualificaziuns èn finidas. Tant en la halfpipe sco era sin il percurs dal slopestyle s’han pudì qualifitgar anc in per Svizzers per ils mez finals.  Els cumbattan davent da oz, venderdi ils 08 da schaner per rivar en il final ni schizunt sin il podest. Davent da las 10:30 savais vus guardar LIVE qua sin battaporta ils mez finals en la halfpipe.

I para da vegnir ina bun’emna per ils Svizzers. Il final da las dunnas en la halfpipe a Tavau è passà e nus vain ina victura rumantscha. Ursina Haller da Zernez gudogna la concurrenza avant Cilka Sadar da la Slovenia. Era sin il podest è rivada Manuela Pesko, schizunt ch'ella veva fatg in onn pausa.

Ursina Haller ha persvadì la giuria gia en l’emprim dals trais percurs. Ils 84.5 puncts ch’ella ha survegnì n’han las autras finalistas betg pli savì cuntanscher. Cun questa victoria ha la giuvna Engiadinaisa survegnì 8000 US Dollars e 1000 puncts sin ses conto da la TTR. Cun quai è ella era siglida enavant en ils top 10 da la cuppa TTR. La victoria da ella era plain confidenza per las qualificaziuns per ils gieus olimpics che han lieu era a Tavau il proxim temp.

En la cuppa TTR (Ticket To Ride) datti be otg concurrenzas sin l’entir mund, che portan il predicat da 6 stailas. Quai èn las pli grondas e grevas concurrenzas en la scena dal freestyle snowboard e dattan era ils pli blers puncts per ils victurs. Dus da quels otg events èn en il Grischun e quai aifer duas emnas. A Tavau cun il O’Neill Evolution e a Laax cun il Burton European Open. Natiralmain ch’i carmala l’elita da snowboardists da l'entir mund da vegnir e sa mesirar.

Tar in uschè grond event sa participescha cleramain era ils megliers snowboardists.. Marko Grilc da la Slovenia, per il mument sin plazza 1 da la cuppa TTR, vegn a defender sia posiziun. Quels che vulan stumplar el giu dal tron èn tranter auter l’anteriur champiun Peetu Piiroinen da la Finlanda ni Risto Mattila, Janne Korpi e Antti Autti. Ensemen vegnan els 4 numnads l’armada Finlandaisa. Ma era svizzers èn favurits per vegnir sin il podest. Iouri Podladtchikov che ha gia gudagnà il titel sco crossover.champ tar il freestyle.ch l’onn passà, ni ils dus grischuns Christian Haller e Gian Simmen. Tuts trais èn en lur meglra furma curt avant ils gieus olimpics a Vancouver. Tar las dunnas vegnan Sina Candrian e Helen Nadig a dar tut per gudagnar ina medaglia.