Al-Gaddafi per president!
Muammar al-Gaddafi vul sparter si la Svizra en sias parts e reparter lezzas als pajais vischinants.
In bun plan, almain per ils ins. Gea, in uschè bun plan ch’i fiss da proclamar Muammar al-Gaddafi per President – cun letra chapitala.
Ina Glossa da Michel Decurtins-Capaul
En ils deserts plats da la Libia po quai funcziunar detg bain: Prender la lingera, trair trais stritgs e parter si l’oasa.
3 stritgs, i saja remartgà!
- Europa tenor Gaddafi
En il territori alpin vesa quai dentant ora in zichel auter. Mo cun parter l’oasa da taglia alpina en trais parts n’èsi numnadamain betg fatg. Il plan da surlaschar la Svizra franzosa a la Frantscha, la Svizra taliana a l’Italia e la Svizra tudestga a la Germania, il plan che la Libia vul inoltrar seriusamain a las Naziuns unidas en la seduta dals 15. d’october, quai plan na vegn betg a funcziunar sco la Libia vul quai.
La Svizra na vegn uschia numnadamain betg radida da la carta politica dal mund, sco i fiss atgnamain il plan da Muammar al-Gaddafi.
Sche la Romandie va als Franzos, il Ticino e le Valli van als Talians e tut ils Schwiizertütschs van als Tudestgs, sche lura resta bain anc insatge.
Geabain.
E quai che resta, quai vegn ad esser davent da lura la Svizra, ubain la Restsvizra: la Svizra rumantscha.
Milch lait latte vegn lura mo pli ad avair num Latg.
E quella Restsvizra vegn ad esser in pitschen stadi liber, circumdà da pussanzas grondas, in stadi da purs suverans cun la chara lingua da la mamma che salva nus dals nauschs plans ord ils deserts libics.
Gie,
Muammar al-Gaddafi vul forsa gest quai : regalar a nus Rumantschs, ch’essan enconuschentamain unics era ina tiara atgna ed unica.
Ed uschia fissi atgnamain mo logic da far il suandant: Dar a Muammar al-Gaddafi il titel dal president d’onur da la Lia Rumantscha. Almain.
Perquai ch’entras el datti – sche la proposta da parter si la Svizra vegn davairas avant la radunanza da las Naziuns Unidas – forsa bainbaud, ni forsa era finalmain – ina nova tiara sin las cartas dal mund: La Rumantschia.
Resta a nus mo pli d’eleger in primminister, ni forsa gest grad in president, ni anc meglier: in dictatur.
" tut ils 30'000 romontschs en ina gruppa"
sin facebook!!!
Salids, Schmo
Jeu da mia vart qutel quei ina buna ideia, hehe, daco buc. Fuss zuar donn per la svizra aber cool per tut ils romontschs.
Quei che fuss empauet tup fuss chins tuess i sur ina duana per i giu cuera a cumprar en.
Mettinsa inagda avon ei. Mereinsa co ei vegn.
Salids Mc Flury