La “LifeBox è ina stgatla da chartun tut normala. In ’s sa trametter chaussas cun quella, ed ils adressats san reciclar ella. Ma reciclar ella fiss magari donn, causa che la LifeBox san’ins era stgarpar en tocs e tils emplantar per laschar crescher fin 100 plantas.

L’idea è fitg simpla. La stgatla consista or da palpiri reciclà maschedà cun ina tschientina da sems da plantas. Mintgin da quels sems è vegnì cuvert cun ina spezia da sporas da bulieus. Sche quai vegn emplantà nutrescha il bulieu al sem e quel cumenza a pruir.    

In concept fitg furber. In bindel da camera che ha integrà cellas solaras che tegnan chargià la battaria dal apparat da fotografar. In zic tecnologia verda cumbinà cun ina chaussa profana – il bindel. Sch’ins chamina tuttina enturn en il liber fai segn da rechargiar la camera. E dapli pais n’as porta era betg enturn cun sai.

Co fissi sch’ins savess collegiar uschè blers cabels d’USB sco ch’ins vul senza avair basegns d’in uschè ditg USB-Hub? Tar quest concept orginal è mintga cabel dad USB al medem mument era in port che creescha in auter attatg.
Uschè san ’ins colliar insaquants apparats tecnics vi da mo in attatg vi dal computer. L’unic dischavantatg: Sch’ins sto distatgar in da quels tranter en.  

La tema motivescha. Quest princip vegn tratg a niz tar la “bumba spargnusa”. Sch’ins emblida da pavlar la bumba regularmain cun raps, lura explodescha quella insacura e derasa tut la munaida en stanza. Quest purschè da spargn spezial posseda dus programs:

“Party mode” (3 nivels)

• nivel 1: schanza da gudagnar 1 a 3
• nivel 2: schanza da gudagnar 1 a 10
• nivel 3: schanza da gudagnar 1 a 30

“Bank mode” (3 nivels)

• nivel 1: pavlar almain in rap al di
• nivel 2: pavlar almain in rap mintga 3 dis
• nivel 3: nivel casual super privlus

Quest attatg per la spina d’aua na guarda betg mo ora bain, el è era nizzaivel. In termostat integrà mesira la temperatura e illuminescha il radi d’aua cotschen u blau. Ina flotta invenziun per tut quels che na vulan betg pli sa brischar la detta en l’aua chauda e per quels che vulan decorar il bogn u la cuschina.

I dat da quels spezialists che han gronda fadia da star si la damaun e vegnir or da letg. En stanza èsi fraid, sut il tarpet regna in chaud agreabel, e subit dorma ins vinavant. Il svegliarin racheta riva da strar or da letg a mintgin. Cur ch’igl è temp da star si, cumenza in countdown pel start da la racheta. Cur ch’il countdown riva sin nulla parta la racheta e l’alarm cumenza. Serrar giu il svegliarin è mo pussibel sch’ins stat si e returna la racheta sin il svegliarin. Cun quest svegliarin ston ’ins simplamain star si.

Quest è ina super alternativa tar las battarias rechargiablas, ina battaria che ha zuppà in attatg d’USB per rechargiar cun il computer. La “USB Cell” è ina soluziun ideala per viagiants che na vulan betg strar cun sai ina staziun da chargiar battarias. Era enturn il computer sez datti divers utensils che dovran battarias. Tastaturas u mirs senza corda, amplificaturs. Cun il “USB Cell” san ’ins duvrar la medema battaria adina puspè da nov.

Ideas per chargiar telefonins senza current electric vegnan adina pli extraordinarias. Cun quest gadget pon ’ins chargiar l’iPhone e trenar ils musculs dal maun. Forsa pon ins in di propi dir: “Quels che han in iPhone han davaira ina ferma strenschida dal maun.

Buttiglias da plastic vegnan duvradas bler memia bler. Cun il ieli che vegn adina pli stgars èn dumandadas alternativas. Duvrar buttiglias or da palpiri n’è betg la soluziun ideala, ma segir in pass enavant ed in pensar ecologic. Questas buttiglias savessan era vegnir producidas pli da strusch als consuments è spargnassan cun quai era custs da transport.

Mai pli emblidar in di spezial. Quest anè gida a memorisar in di spezial. Saja quai il di da nozzas u l’anniversari da l’amia, sche vus purtais quest anè gida quel a memorisar.En il anè è zuppà in’ura interna che dovra mo la chalur dal man per funcziunar. 24 uras avant il di spezial sa stgauda quest anè sin 50 grads per var 10 secundas. El cuntinuescha da stgaudar mintg’ura uschè ch’ins n’emblida segir betg il di impurtant. Cun in pretsch da passa 800 francs n’emblida insumma nagin pli quella data. 

Cun excepziun dals manischunzs d’in VW “Käfer” che ha integrà ina vasa per flurs han tuts da basegn d’in toc natira en lur auto. Il problem cun metter ina vasa da flurs sin l’armatura è, che sch’ins va cun il auto sco in mez nar, sch’ins piglia las stortas sco quels da la Formula 1, lura glischa la bella vasa da flurs giu da l’armatura e rumpa. In pastrigl da terra smerda il fond da l’auto. Quest problem è ussa evas cun ina vasa da flurs che tatga vi da la fanestra da l’auto.

“Discurra cun mes man!” Questa giada è quai manegià litteralmain. In nov guant da snowboard ha integrà in “Bluetooth handset” per il telefonin. Il guant vibrescha sche il telefonin suna. Cun in smatg sin il dies dal maun san ’ins respunder il clom. Discurrer pon ins tras il polesch e la palma dal maun.

I na dat nagin meglier sentiment che sentir l’erva loma sut ils pes cun chaminar, ma la realitad è che ina buna part da nossa terra è asfaltada. Ils FlipFlops da tschispet èn la soluziun. Cun quels sentis vus in toc natira sut ils pes era sche ti chaminas tras citad. Sche ti guardas bain da l’erva tegna quella per bundant 4 mais.

Il “Napbook” è propi ina buna invenziun. Nagut auter sco ina tastga per purtar il Notebook. Ma quella è fitg grossa è loma, uschè ch’ins po duvrar ella sco plimatsch. Ideal per tut ils workaholics che lavuran fin tard en la notg. U per il viadi vers chasa en il tren sco cussin per ina buna durmida. Ed al medem mument è il laptop segir cunter ladernitsch. 

Avis magliadruns tranter ils collavuraturs? Da quels che engolan gugent il bun sandwich che vus vais preparà a chasa cun amur. Uss datti in satg da plastic cun miffa artifiziala. Tut quels che guardan sin quel sandwich en il satg spezial, a quels passa subit l’appetit. E vus pudais laschar vossa marenda senza surveglianza sin voss pult.

Il cap solar guard ’ora sco in normal cap da baseball, ma el è in cap spezial. Durant il di chargia ina cella solara ina battaria zuppada en il cap. Da notg glischan duas glischs da LED la via en il stgir. Sulettamain 2 uras en il cler dal di bastan per sur 12 uras glisch la notg. Il cap è ideal per ir a campar, pestgar u en muntogna. El tegna l’aua e po schizunt signalisar “SOS” cun las glischs.

Cun questa gadget sa mintgin liar sez sia cravatta. Il gadget è simplamain ina cravatta cun in design d’instrucziun sco liar ina cravatta. Damai, sa metter davant il spievel e suandar las instrucziuns.

Quest telecumond na dovra naginas battarias. Per furnir il telecumond cun forza electrica  ston ’ins girar la manvella 30 giadas e l’accu è chargià plain. Questa metoda fiss era pratica per divers auters utensils che dovran battarias.

Quels che na sa levan betg gugent la damaun or da letg e na pon betg bittar lur svegliarin cunter la paraid perquai che quel rumpa cun gronda segirtad en milli tocs, per quels datti ussa il svegliarin per bittar “Time Flys”. Per serrar giu el, simplamain bittar cunter la paraid e subit regna quietezza en chombra.

Bod tuts da nus han fotografias da lur chars en la bursa. Cun il temp guardan quellas però ora sblatschas e demolidas.
Cun questa bursa na capita quai betg pli. Fin 60 fotografias pon ’ins chargiar sur USB sin in pitschen visur. Ina mini battaria porscha l’energia ch’è necessaria. Sch’ins vul esi er pussibel da prender ora il visur da la bursa.

Quai che vus vesais sin il maletg è in “load-ding”. Quest “load-ding” prenda il virrvarr da cabels che penda enturn e depona el en in indriz da portar. Tuttina sche quai è per il telefonin, la camera digitala, il GameBoy u l’iPod. Il “load-ding” fa urden cun tut ils cabels.

Tut quels che han danvanz in zic munaida san cumprar in raspun en ina roda purtanta. Ma daco dovra quel raspun in cabel d ’USB? Per l’ina dovra’l forza electrica e per l’auter curra’l sulettamain cur che vus scrivais sin la tastatura. Almain na fai betg da basegn da pavlar el.

Vais avunda dal vent, che stida puspè adina la flomma dal battafieu? Essas stufs da cumprar adina novs battafieus causa ch’il gas è finì? Lura è il USB battafieu il ideal gadget per vus. Cun ina singula chargiada vi dal computer è il battafieu capabel d’empizzir varga 150 giadas. El funcziunescha sco in envidader en ils autos, uschè ch’il vent n’è betg in problem.

Per tut quels che han fadia da tegnair in man lur pitschen telefonin datti ussa in corn da telefon sco da pli baud. In ’s sto mo colliar il corn cul telefonin e subito pon ’ins telefonar sco pli baud.

Per tut quels che fan pli gugent giu la paletscha d’ina banana che mangiar ina banana datti ussa in perfect gadget cul num “Endless Banana”. Il pitschen gadget fa perfin mintga giada la ramur da far giu la paletscha. Quella ramur è vegni registrada da la enconuschenta actura da vusch Saki Fujita (enconuschent sco vusch en films da manga). Daco che han registrà quella ramur fatga d’in uman n’è betg cler. Quest gadget è propi banana!

Tut ils apparats che dovran battarias dovran era ina tscherta quantitad forza. Ma sche las battarias èn vidas n’èn ellas betg vidas dal tut. In rest energia è adina danvanz. L’Energy Seed è ina glisch da LED che sa nutrescha per uschè dir da “battarias vidas”. Simplamain bittar las battarias en diversas foras vi da la glisch è vualà, i vain glisch. Sa chapescha che ina giada che las battarias èn vidas dal tut
ston ’ins reciclar quellas.

Ils headphonies èn pitschnas boxas ch’ins po colliar cun in iPod u in auter mp3-player. Questas boxas datti en different figuras sco Ninja, schimgia, skelet u urs rosa. La battaria interna pon ’ins rechargiar sur USB.