Cun ina gronda festa sut tschiel avert è il project Get-Together, Inscunter da las linguas, ì a fin sin la plazza federala a Berna. Cun concerts, differentas producziuns, workshops e stans da mangiar èn tut las quatter parts dal pajais s’inscuntradas per in’ultima giada – a la gronda festa da las linguas.

La festa da finiziun ha gia cumenzà a las 10.00 uras. Regina Steiner ha dà in concert da tiba a moda moderna. Cun furmas da musica in pau nunusitadas hai cuntinuà, numnadamain cun ina cumbinaziun da steeldrums ed arpret. L’aura è lura era sa meglierada a chaschun da la proxima preschentaziun: il bloc rumantsch cun in lavuratori da lingua ed ina prelecziun da l’autur Arno Camenisch. Adina dapli glieud è vegnida sin la plazza federala e fin al pled festiv da signur Jauslin, directur da l’Uffizi federal da cultura, era quella bain emplenida.
Il suentermezdi è lura stà sut l’ensaina da la musica quadrilingua. Cun Knackeboul da Berna, Pamplemousse da la Svizra franzosa, la gruppa italofona ABC Sound ed ils hiphoppers rumantschs da las Liricas Analas han ils bunamain 4'000 aspectaturs pudì giudair insatge ch’è mo pussaivel en ina Svizra quadrilingua.

Dumengia, ils 15 d’avust 2010, ha lieu sin la Plazza federala a Berna la gronda festa finala dal project Get-Together, inscunter da las linguas. La festa è il punct culminant suenter che giuvens creschids èn viandads durant tschintg emnas atras las quatter regiuns linguisticas da
la Svizra.

Questa emna maina ils participants en il cor da la Svizra: a Berna. Là ha lieu dumengia proxima la gronda ‘festa da las linguas’ sin la Plazza federala. Tranter las 10.00 e las 22.00 uras vegnan divers concerts, represchentaziuns, workshops e spezialitads culinaricas da tut las parts dal pajais a demonstrar anc ina giada tge che la plurilinguitad munta en Svizra. Elements tradiziunals e moderns da las differentas regiuns vegnan a porscher a tut ils interessads in program varià sco quai ch’igl è mo pussaivel en Svizra. Al pled uffizial dal directur da l’Uffizi federal da cultura suonda in lavuratori da beat-box manà dal duo Knackeboul & Cookie the Herbalist. Suenter in viadi musical en la Svizra romanda ed en il Tessin fan lura las Liricas Analas, ils electro-hipoppers dal Grischun, anc ina giada stremblir la plazza cun lur rimas rumantschas.

L’entrada è libra ed envidads èn tut quellas e quels che vulan viver la cultura linguistica da la Svizra e che vulan festegiar.

Da bellezz' aura ha ina gruppa da viandants cuntanschì Sobrio ed ha pudì giudair l'ospitalitad tessinaisa. Bunamain dapertut ha la populaziun indigena surprendì ils viandants cun purschidas cordialas ed è adina sa mussada servetschaivla. Uschia era durant il di da project ad Olivone, nua che l'incumbensà per il turissem ha envidà persunalmain ad ina spassegiada.

Dumengia proxima s'inscuntran las duas gruppas da viandants ad Engelberg. Quai vegn celebrà cun in apero sponsurisà da la vischnanca. Davent dad Engelberg viandeschan ils participants communablamain fin a Berna, nua che la festa da finiziun ha lieu ils 15 d'avust sin la Plazza Federala. Daletgs musicals e culinarics da tut las parts dal pajais vegnan a procurar per divertiment durant la festa.

L’emprima emna da viandar è passada per omaduas gruppas senza gronds incaps. Las rutas han pudì vegnir percurridas sco planisà. Ina gruppa sa chatta dentant en l’Engiadina Bassa sin via a Cuira.
La segunda gruppa è a Losanna e vegn a suandar ils proxims dis la riva dal Lai da Genevra vers Montreux.

Gia ussa sa legran giuvens creschids sin ulteriurs inscunters fascinants durant las proximas quatter emnas. Tgi che ha interess da viandar ensemen cun Get-Together po era far anc ussa quai – ch’i saja lura per in di, per in’emna u per l’entir viadi. La ruta da viandar ed ulteriuras infurmaziuns davart il project datti sin la pagina www.get-together.ch.

Tschintg emnas sin viadi atras la Svizra cun giuvnas e giuvens da tut las regiuns linguisticas e tras tut las regiuns linguisticas. Quai è il Project «Get-Together - inscunter da las linguas».