Gianluca Cologna ha 18 onns, el è gimnasiast e passlungist e vegn da Tschierv. El è il frar "pitschen" da Dario Cologna, che spera da gudagnar ina medaglia al campiunadi mundial ski nordic a Liberec en Tschechia. Gianluca declera en il discurs cun il moderatur dal Radio Rumantsch Claudio De Pedrini co el sa senta sco "il frar pitschen" da Dario, co el riva da far la matura e da far parallel sport intensiv.

Anc mai ha la Rumantschia gì uschè ina buna generaziun da curridurs e curriduras da passlung. Ils nums: Cologna, Livers, Perl, Tambornino e Mischol. Ma era gia la proxima generaziun è a la partenza. In da quella generaziun ha in num prominent: Gianluca Cologna dal club da skis Val Müstair. Al campiunadi svizzer a Trun ha il giuven Cologna gudagnà duas medaglias d’argient.