La band Gorillaz è sa retratga sin sia insla da plastic e spetga fin che ses nov album vegn en las butias. Er da là emetta il bassist Murdoc Niccals sias emissiuns da radio.
Prest èsi uschè lunsch. Ils 8 da mars cumpara il nov album Platic Beach, il terz album da studio, nairas uras per preschentar ina giada la band sin battaporta.

La biografia da Gorillaz è tipica per els.

Ina sonda saira: Il giuvenot Stu-Pot è vi da dar in concert cun la gruppa Norm's Organ Emporium. Lur finamira è da vegnir renumà.

La medema finamira ha er il Murdoc. Perquai charrescha el cun ses auto atras la vitrina fin sin tribuna per engular ils instruments e fundar cun quels ina nova band.
Quai va natiralmain dasperas u meglier ditg en in egl. En quel dal Stu-Pot. Il Murdoc vegn sentenzià a 30’000 uras lavur e dad ir a spass ina gia l’emna cun il Stu-Pot. Quai va puspè en in egl, il segund dad il Stu-Pot.
 
La perdita da la vesida mida sia moda da sunar keyboard e davent dad uss sa numna Stu-Pot,l 2D.

Il medem temp perda il giuven Russel ses amis en in grev sajettim a New York. Pervi dal schoc vegnan ses egls dal tut alvs ed el survegn talents surnatirals per la ritmica e la musica da Hip Hop. Ses geniturs tramettan el en l’Engalterra, nua ch’el duai viver ina vita pli normala. Quai sa mida, cura ch’el emprenda d’enconuscher il Murdoc.

Uss manca sulettamain in ghitarrist. En l’internet tramettan els in inserat per l’entir mund enturn. Ed il medem di arriva in pac dal Giapun. Or da quel siglia ina buoba da 12 onns cun enta maun ina ghitarra, ina Les Paul. Els na chapeschan nagut da quai ch’ella di, ma na san betg serrar la bucca, cura ch’els audan co ch'ella suna ghitarra. Il sulet pled ch’els chapeschan è Noodle.