Far chaltschiel gilets, far cul crutsch chapitschas, decorar t-shirts... Lavur da maun è puspè in! Ma pertge mo purtar sez quai ch’ins fa a maun, pertge mo regalar las atgnas ovras a commembers da la famiglia?
Chaussas fatgas a maun plaschan era ad auters e sa laschan vender ozendi fitg simpel en la rait. Sin paginas ch’èn fatgas aposta per quai. Sco per exempel ils t-shirts dad Annatina Dermont sin guzuu.com.

Trais giuvens lucernais han mess ad ir la pagina guzuu.com cun l’idea da crear in sistem da butia per chaussas fatgas a maun. Cun il motto “pli gugent fatg sez sco da la China” han els cumenzà a lavurar vi da guzuu.com. Dapi il 2008 è la pagina online. Ella n’è betg l’unica da quest gener.  

Il “do it yourself movement” è rivà en la rait  

Sumegliant a guzuu.com èn dawanda.de e marke-eigenbau.org da la Germania. En ils Stadis Unis datti gia millis da chaussas fatgas sez sin etsy.com.  

"Wir prosumieren" (la cumbinaziun tranter wir konsumieren e wir produzieren) è in auter motto da guzuu.com. Per profit na vai betg, tgi che venda insatge sur guzuu.com sto però dar giu ina sort provisiun als administraturs da la pagina. 

-> guzuu.com