Tras l'univers cun Justice

Sch’ins di Justice e video, lura datti “Stress”. “Stress” è stà il video da musica il pli discutà da quest onn, il video tar il toc “Stress” da Justice. En quest video va ina gruppa da giuvens immigrants tras in Banlieu franzos e pitga ensemen a tut e mintgin che vegn encunter. Vai per violenza? Vai per rassissem? Vai per ina critica vi da las medias, vi da la societad? La debatta e las rinfatschas a Justice èn stadas enormas. Els hajan be vulì far in clip per far dumondas, per cumenzar ina debatta sco che films, litteratura ed art fetschian quai savens.  

La debatta hai dà, ma dapli sur dal video che sur da ses cuntegn. Il reschissur dal video è stà Romain Gavras. Quel Romain Gavras che ha fatg il film documentar “A Cross The Universe” sur da Justice.

Puspè stress?  

Il film documentar sur da la turnea en l’America dal nord da Justice è para fatg senza concept. Romain Gavras ed il co-autur, l’illustratur franzos SO-ME hajan simplamain filmà permanentamain durant la turnea da 3 emnas, quai han Xavier de Rosnay e Gaspard Augé raquintà al magazin da musica canadais “Exclaim”. Pir suenter han’ ins fatg l’istorgia or dal material. Total haja Garvas gì 200 uras material da film, quel è vegnì taglià ensemen ma mussà vegn tuttina anc avunda en il film final dad 1 ura.  

“A cross The Universe”  – il film è in’ura Justice e cun mintga minuta perda il duo in pau da sia fascinaziun, era u gist perquai ch’ins na vegn betg a savair bler sur da Gaspard e Xavier. Ils dus musicists dian pauc, restan absents e paran dad esser mo preschents cur ch’els van sin tribuna u cur ch’els fan musica. (Sper tribuna suna Gaspard flauta e Xavier clavazin.) Per la musica vai mo a l’ur dal film. Mussà vegn en emprima lingia il mintgadi sin turnea, la glieud ch’è en gir cun Gaspard e Xavier.

Violenza e cretta

Bouchon - uschè ha num il manager sin tura da Justice ed el è uschè fascinà dad armas ch’el vegn arrestà en mez la pampa americana. Il chauffeur da bus è in vair american, crettaivel ed optimistic, el maina la squadra en tutta calma tras tut il continent.

Entant che questas persunas vegnan a pled restan Gaspard e Xavier mits, els èn plitost quels da las acziuns, Gaspard cur ch’el marida spontan a Las Vegas e Xavier cur ch’el sfratga ina buttiglia giu per il chau dad in fan e vegn arrestà suenter il concert.

"We are your friends"

Nus essan voss amis, “you’ll never be alone again, well come on”, ti na vegns mai pli ad esser sulet, vè! Uschè va il grond hit da Justice “We are your friends”. Sche Justice porta el ad in concert èn las massas en extasa. Il effect da Justice funcziuna però mo sin distanza:  da pli datiers èn Justice simplamain dus giuvens in pau schmuddeligs ch’ins na vul gnanc avair sco amis.

Cun quella conclusiun pon ’ins metter da la vart il DVD e pachetar ora il DC da “A Cross The Universe”. I va gea per la musica, e questa è buna ed ideala – per la party da Silvester per exempel.

Text: Chatrina Josty