Vuls era ti esser in “Foodie”?
Intgins enconuschan forsa gia la plattafurma couchsurfing.com, nua ch’ins po dar a disposiziun l’agen canapé per viandants ni tschertgar sez in canapé per durmir insanua en l’ester. Quella purschida duess ussa era funcziunar cun cuschinar ni laschar cuschinar.
Tschertgà èn “Foodies”. Uschè vegnan numnads sin la plattafurma livemyfood.com quels che porschan a sai sez sco cuschinunz per esters. L’idea è simpla e sumeglianta sco tar couchsurfing. Enstagl porscher in canapé per esters che èn en viadi ans porscha la pussaivladad da vegnir a mangiar gentar ni tschaina tar in. I funcziuna era da l’autra vart. Sch’ins va insanua en vacanzas, enstagl visitar in restaurant, daco na ir a mangiar tar indigens che cuschinan spezialitads localas.
Sin la pagina san ’ins registrar sco giast, sco osp ni sco tuts dus. Là ans creescha in profil cun infurmaziuns davart sai sez e tge spezialitads culinaricas ch’ins savess porscher. Mintgin sa sez decider sch’el vul laschar pajar ils visitaders ni offrir la tschaina gratuita. Cun notas e commentaris san ils giasts lura evaluar la ospitalitad e buntad da lur visitas culinaras.
En il mument na datti anc betg blers participants, ma l’idea è anc giuvna e frestga e la rait crescha di per di. Avant in emna eran anc 11 persunas registradas da la Svizra, ussa èn gia 49. Ed ils iniziants èn plain fidanza che en pacs mais datti ina massa novas pussaivladads dad ir a mangiar privat sin l’entir mund.
