Madonna a Dübendorf
Ils 30 d'avust dat Madonna per l'emprima giada en sia carriera in concert en Svizra. Per realisar quest event han ins stuì investir ina massa lavur e daners. La plazza militara da Dübendorf vegn preparada per quest intent dapi passa duas emnas, e tut quai per duvrar la tribuna mo per tschintg uras. Rendan tut quellas stentas? Nus avain discurrì cun ils organisaturs.
Madonna è in fenomen. Als 16 avust vegn l’icona da pop 50. Ella vala sco ina da las pli renumnadas dunnas dal mund. Na pervi da sia carriera da musica, in prima lingia pervi da sia persunalitad. Madonna è adina in pass oravant als auters.
