Open Air Tester: Pitschen gudogna
Per ils ins stoi avair in Bacardi Dome, per ils auters ina gronda band da renum internaziunal. Ils ins prefereschan musica per scuvrir, ils auters na s’interessan insumma betg per la musica e van per far tenda cun lur amis. Ils ins vulan mangiar bain, ils auters dovran la tualetta perfetga per sa sentir bain.
Ils gusts èn differents. Nus avain testà e congualà questa stad 11 open airs en Svizra, 9 grischuns e 2 ord ’vart il chantun.
A la fin ha gudagnà quai che ha plaschì il meglier a nus. E quai n’ha purschì betg mo in open air. I dat plirs victurs.
Ins pudess dir che nus hajan congualà pairs cun mails, il congual dad in Open Air Son Gagl cun in Bellaluna, dad in Open Air Malans cun in Open Air Lumnezia è in congual sur categorias ora.
Ma in congual legitim: Tut las occurrenzas che nus avain testà e congualà sa numnan sez “Open Airs” u festivals da musica.
Nus essan stadas 4 differentas persunas ch’han testà ils 11 Open Airs. Quai èn stads: Curdin Fliri, Chatrina Josty e Mirco Manetsch da la redacziun da battaporta ed Angela Hitz da la redacziun da cultura dal Radio Rumantsch. Uschè differents sco che nus essan, uschè differents èn noss gusts e cun quai nossas valitaziuns dals open airs. E tuttina avain nus chattà in consens.
Nus avain empruvà da fixar in pèr criteris ch’ins po giuditgar objectivamain. Ma a la fin èsi mo normal, ch’ina liongia da brassar na gusta a mintgin tuttina bain e che tscherts èn insumma vegetaris.
Il facit dal test è perquai: Restar objectiv va strusch sch’ins fa il test dad in open air, a la fin giuditgesch’ins adina cun ils agens egls.
Ma noss egls han fatg il congual. Tar quest congual s’ha mussà: Pitschen ha plaschì meglier che grond, patgific meglier che las fullas, originalitad meglier che commerzi.
Nus avain trais open airs ch’han survegnì ils blers puncts. Mintgamai 8.1 puncts han survegnì l’Open Air Chapella, l’Open Air Malans e l’Open Air Hohen Rätien. Trais open airs ch’han inqual chaussa cuminaivla. Ils trais open airs èn pitschens (cun in numer da visitaders tranter 200 e 600 persunas). Ils trais open airs han in budget pitschen ed èn forsa gista perquai originals.
Ils 3 open airs èn originals, quai che pertutga il lieu e quai che pertutga l’offerta (Chapella: offerta per uffants. Malans: infrastructura patgifica cun bleras pultrunas per seser e fieus decorativs. Hohen Rätien: Bar originala e program per scuvrir).
E tut ils trais open airs n’èn betg uschè commerzials sco auters. Quai vul dir, sco visitaders a quels open airs n’èn ins betg mo in object en mira per quels che vulan far reclama. Na, ins po esser in individi che ha avunda lieu (e n’è betg sco ina sardina als open airs gronds tranter la glieud).
Ins è ina persuna che po seser u star en pe cur ch’ella vul e che po simplamain giudair il program e l’atmosfera.
Quai han ils trais open airs victurs purschì il meglier e quai ha tutgà il gust da la redacziun da battaporta.
