Chargia giu il formular cun tut las nominaziuns...
Ils Oscars 2010 - Ils blockbusters èn favurits
Plaunet datti ina midada en la selecziun da films che vegnan nominads per l’Oscar, il pli impurtant premi en la scena da film. Betg mo ils favurits dals critichers vegnan selecziunads, mabain era quels ch’han tratg la pli blera glieud en ils kinos. Quest onn cun in duel tranter um e dunna, realitad e ficziun, brutalitad e bellezza.
- Avatar
- The Hurt Locker
Chau a chau èn James Cameron e sia ex-dunna Kathryn Bigelow. Cameron cun il spectacul da science fiction Avatar e Bigelow cun il film da guerra da l’Irak The Hurt Locker. Omadus films èn nominads per nov Oscars ed èn ils favurits als 82avels Academy Awards ch’èn ils 7 da mars 2010. Tranter auter èn els nominads sco meglier film e la meglra reschia. Kathryn Bigelow pudess schizunt scriver istorgia da l'Oscar, sch’ella gudagnass la trofea sco meglra reschissura. Fin uss eran mo 3 dunnas nominadas en la categoria reschia, ma nagina n'ha survegnì il premi.
- Christoph Waltz
Avatar e The Hurt Locker n’èn betg ils unics films favurisads. Era nominà sco meglier film, meglra reschia ed anc en 6 ulteriuras categorias è la satira davart ils Nazis Inglourious Basterds da Quentin Tarantino. Favurit è segir era l’austriac Christoph Walz ch’è nominà sco meglier actur da support per sia rolla sco militarist da la SS a moda e maniera scharmanta e cinica.
- George Clooney
- Gabourey Sidibe gioga a Precious
Sin ina trofea po era George Clooney sperer. El è puspè ina giada nominà sco meglier actur principal. En la cumedia Up In The Air gioga el ina persuna che sto sgular da piz a chantun e relaschar collavuraturs. Il film è sper sia nominaziun anc nominà en 5 autras categorias.
Era per 6 Oscars è il drama Precious nominà. L’istorgia trista d’ina giuvna corpulenta cun pel stgira da 16 onns che viva a Harlem ed è en speranza da ses agen bab, e che vegn bastunada da sia mamma.
Ina pitschna midada porscha immediat era ina surpraisa. En la categoria principala, il meglier film, datti davent da quest onn 10 candidats, enstagl mo 4. Nov è che tut ils films pon esser candidats per quest premi, era films animads. Uschia è il film Oben da Pixar nominà tant en la categoria dal meglier film animà sco era en la categoria meglier film.
