Malcuntentientscha

Che la malcuntentientscha saja in stan da basa da nus Rumantschs è vegnì pretendì dal secretari da la Lia Rumantscha a chaschun da la radunanza da delegads ils 18 d’october a Samedan. E che la Giuventetgna Rumantscha saja engurda e pretendia dapli daners è vegnì pretendì curt pli tard en La Quotidiana.

Ina part dals daners che mancan a la GiuRu, mancan en l’onn 2009 er a las PUNTS, ma quai na duai betg muntar la fin da la gasetta giuvna. Ed en ina depressiun da malcuntentientscha generala na vegn nagin da las PUNTS a crudar pervia da quai. Gliez è plitost il cas, sche la lavur che stat davostiers na vegn betg appreziada e forsa taxada sco termaglim dad insaquants students che scrivan be per els sezs e sfarlattan daners.  

 Tge che las PUNTS pensan uschiglio anc da la politica da famiglia da la Lia Rumantscha, ses sustegn da projects cun in svilup durabel e pertge che las PUNTS avessan franc er in plaz en quellas ideas, pudais vus intervegnir sin pagina 17 da las PUNTS actualas.

Dapli intelligenza cun gieus?

Tschertins èn era malcuntents, sch’els vegnan en ina situaziun da dar gieus da cumpagnia. Dasperas avessan gieus blers effects positivs. Quai demonstrescha Gianna Sonder en ses text che raquinta da l’experientscha da sclauder la televisiun ina saira en sia cuminanza d’abitar e da sa deditgar als gieus. E Catrina Waldegg scriva davart la cumprova scientifica che gieus da cumpagnia augmentian la creativitad dals uffants e franc era dals creschids.    

Gieus per las ureglias?

Sa chapescha che era auters gieus vegnan tematisads, uschia per exempel ils gieus auditivs – u pli exact: «il soli giug auditiv da vaglia». Da l’intervista cun Michel Decurtins-Capaul intervegnan il lectur e la lectura tge che Sascha Hehn ed Arturo Casanova han da tschertgar en gieus auditivs e ch’i dat era la gruppa d’investigaziun da CSI en Surselva, numnadamain a Trun/Rabius...