Portafortunas e spazzachamins  

Danovamain han pliras persunas reflectà davart il puntissimo dal mais. Anina Sonder scriva davart objects da portafortuna e portadisfortuna ed inditgescha lura era gist, tgenin ch’è il meglier portafortuna. Spazzachamins èn in dals “objects” da portafortuna ils pli enconuschents. Catrina Waldegg ha fatg in’intervista cun Emmanuelle Balestra, in emprendist da spazzachamin. «Tge fa atgnamain in spazzachamin?» è stada la dumonda ed oravant tut era: Tge fauss maletg ha la glieud da questa professiun?

L’oroscop per il 15 avel anniversari da PUNTS  

La midada da l’onn è era adina cumbinada cun la dumonda: Tge ma porta l’onn proxim? PUNTS festivescha la primavaira 2009 ses 15avel anniversari e vul sa chapescha era savair, tge che quest onn portia a la gasetta ed a ses lecturs. Perquai ha PUNTS supplitgà l’astrologa Andrea Könz-Meier da far in pitschen oroscop. Tge che las stailas portan a las PUNTS pudais vus leger sin pagina 6 da l’ediziun actuala. Forsa che las stailas portan ina plievgia da daners? Forsa, sch’ins faschess mintgatant lotto. Silvana Derungs è s’occupada cun quest gieu da fortuna e dat insaquants tips, co ins gudogna dapli daners – sch’ins ha lura ina giada effectivamain insaquantas cifras gistas. Tgi che vul pia gudagnar daners, duai abunar las PUNTS!