Catrina Waldegg s’è messa sin ils fastizs da retschertgas scientificas ch’han empruvà da mesirar la bellezza. Tgenins èn ils recepts per la perfetga bellezza? Avair ina fatscha tenor la media? Avair ina fatscha simmetrica? Avair la dretga cumbinaziun da madirezza e tratgs uffantils? Dapli en «Spievel, spievel ve dalla pare...» sin pagina 6 da las Punts actualas.  

Cun la bellezza sa fatschentan era Maud Andina da Tschlin e Daniela Derungs da Surcasti mintga di. Ellas fan omaduas l’emprendissadi sco emploiadas spezialisadas da fotografia a Cuira. En las Punts respundan ellas ad insaquantas dumondas davart las bellezzas e tridezzas da lur professiun e davart clientella betg cuntenta cun il resultat sin las fotografias.

Ina persuna ch’è sezza adina puspè sin purtrets è Daniela Natalia Columberg. En las Punts actualas sa chatta ella sin la pagina 11, vestgida en bels dessous. Sa chapescha ch’i dat er in text latiers; Flurina Cajochen ha vulì savair tge ch’è sa midà en la vita da Daniela dapi si’elecziun sco Miss Maxim, tge ch’ella chapescha sut bellezza e tge plans ch’ella ha per il futur.

Cun purtrets ha era Nina Piffner lavurà – quai en il rom da sia lavur da matura. Ella ha creà purtrets dad act da dunnas e dat en las Punts ina pitschna invista en il process da sia lavur. In’autra preschentaziun dad ina lavur da matura pon ins leger dad Irene Mercuri che preschenta la bellezza dal vitg da Schlarigna enturn l’onn 1900 ed il svilup dapi lura.