Fabian Augustin raquinta a moda nostalgica davart ses temp en il convict a Cuira – ed oravant tut davart las sairas liquidas en la citad da Cuira cun Calanda e cumpagnia. I vegn raquintà dals exercizis dal Chor rumantsch e da las tacticas per spargnar daners en sortida. Per exempel savais vus tge ch’ina «Schwedische Festvorbereitung» è? Betg? Lura legiai questas Punts!
Er il columnist da «Il pled dal mais» Ursin Lutz s’occupa da la gervosa, pli exact dals nums «pier» e «gervosa». Sche vus na savais betg tgenina ch’è la differenza tranter in «pier» ed ina «calanda», lura èsi nairas uras da leger quest artitgel.

Liquids en il corp

La gervosa e l’aua – ed il rest da noss nutriment era – ston passar tras noss corp. Quel – nus savain gia – consista per ina gronda part dad aua. Ma nua sa chatta quella insumma? Silvana Derungs è sa messa sin in viadi «Da la spida fin al sperma» atras noss corp uman e preschenta fatgs enconuschents e main enconuschents davart noss liquids corporals. Avessas vus per exempel pensà ch’i vegnia producì fin 1.7 liters spida al di en nossa bucca? Avais vus era mintgatant mustgins che sgolan en voss egls? Savevas vus che nus mangiain tuts nossa mutschigna? U savais vus pertge che las dunnas han pli savens in’inflammaziun da la vaschia?

Armas chemicas...

Cun tut autras substanzas è Marcial Monn da Cavardiras s’occupà. Per sia lavur da matura a la Scola chantunala a Cuira ha el descrit l’istorgia da l’Emprima Guerra mundiala ed oravant tut quella da las armas chemicas utilisadas en quella guerra. Tgi che vul avair ina survista da las differentas «cruschs» – las categorias da las armas chemicas – duai leger las Punts sin pagina 7.

...e marineras

Betg ad armas chemicas, ma ad auters privels è Nadia Scarpatetti exposta en sia professiun. La giuvna da Parsonz ha fatg in emprendissadi da marinera. En in’intervista cun Catrina Waldegg raquinta ella dal maletg dal mariner, dals privels en la professiun, davart l’esser dunna tranter tants umens e da bler auter. Per exempel era, sch’i dat forsa in di in nov cudesch suenter ses debut «La libertad è manevla».

Novs auturs tar las PUNTS

Sa chapescha ch’i dat anc auters interessants artitgels sin las 20 paginas da las Punts actualas. Per exempel raquinta Adrian Stecher a partir dad ussa mintga mais en sia columna davart concerts, novas bands, albums ed experientschas fatgas cun la musica. Medemamain ina nova persuna s’exprima en la rubrica da las «Punts politicas»: Simon Casutt da Falera fa – ensemen cun Clau Dermont – insaquants patratgs davart l’iniziativa d’etica, davart la quala vegn decidì ils 17 da matg 2009.

la redacziun da PUNTS