En nossa societad datti differentas subculturas. Insaquantas da quellas – per exempel ils puncs, ils hiphoppers ed il hippis – vegnan preschentadas da l’emprima classa da la scola secundara da Zuoz.
En il milieu da la scola resta era Orietta Peduzzi che descriva las differentas gruppaziuns en sia classa, la 4Gc en la Scola chantunala a Cuira.  

Ils privels dal facebook

Flurina Cajochen s’occupa dad ina rait sociala fitg attractiva, ma era privlusa per l’atgna sfera privata: il facebook. In curt extract da ses text: “Sil facebook san ins p.ex. scriver novitads ad amitgs ed amitgas ni contactar persunas ch’ins ha gia daditg buca pli viu. Mo quei diever mutescha tier biars utilisaders ad ina pissiun da rimnar aschi bia enconuschientschas sco pusseivel. Cun quei san ins mussar con giavischaus e carezaus ch’ins ei. Mo leu nua ch’ins sa anflar aschi biars amitgs, san ins era anflar inimitgs. Certas persunas vegnan confruntadas cun malemperneivladads maina spitgadas. Ell’Engheltiara ed ell’America ei gia mintga tierz affon disponius agl aschinumnau fenomen da «Cyber-Mobbing».”  

A l’ur da la societad

Catrina Waldegg ha fatg ina reportascha “Agl our dalla societad”. En l’introducziun scriva ella: “Sen mia veia da scola passa mintga de igl Stadtpark da Coira. Savens veia la madema gliout a tschantar sen en banc u sen veia vers igl Denner per eir a cumprar alcohol u cigarettas. Gio bleras gedas sunga ma dumandada, noua tgi chesta gliout dorma, maglia, fò la duscha…” e perquai è ella sa decidida da far ina reportascha or da l’instituziun «Überlebenshilfe» dal chantun Grischun. Il lectur e la lectura intervegnan davart las funcziuns da quest’instituziun e pon era leger davart la motivaziun ed ils plaschairs da quella lavur per il pedagog social Werner Erb.    

Empruvai ina giada las Punts! Quai e bler dapli datti da leger en las novas Punts. Be gughegiai da leger tge culturas che fatschentan ils giuvens!

la redacziun da PUNTS