“Meglier ch’in Amavita-Riegel”

Vulais savair tge che l’adrenalin effectuescha en noss corp? La redactura Catrina Waldegg as dat ina invista ed explitgescha, pertge che l’ormon d’adrenalin porta en situaziuns da privel dapli ch’in energy-drink u in bastunet Amavita.  

Da las energias en il corp uman è era Christoph Mareischen s’occupà. El illustrescha cun pliras cumparegliaziuns il sfarlattim d’energia da noss autos – u ils stgaudaments sin quatter rodas, sco el als numna. Sche vus vulais savair, quants kilometers che Fabian Cancellara pedalass cun l’energia dad 1 liter benzin u cun l’energia dad ina tschigulatta, lura legiai il text sin pagina 5 da las Punts numer 179.  

Spargnar e duvrar calorias

L’energia che nus duvrain per stgaudar nossa chasa e per avair glisch da leger in cudesch è er in tema per Silvana Derungs, dentant fa ella era ponderaziuns co spargnar autras furmas dad energia. U co duvrar anc dapli energia. Numnadamain quell’energia accumulada en noss corp:  

«Jeu savess mo pli leger sin peis enstagl da scher da smarschun sin canapè: dovra 120 kcal per ura enstagl da mo la mesadad. Da l’auter maun: il leger ei – dependent dil gener da lectura – per il pli in’activitad plitost intellectuala che drova energia. Nies tschurvi drova en stadi da paus da nies tgierp bunamein in quart dall’energia digl entir organissem. Sch’el sto ponderar fetg, semida (deplorablamein?) il diever dad energia buca considerablamein (patertgar remplazza pia buc exnum la dieta ... u forsa mintgaton tuttina?).

En situaziuns da stress trai quei organ sut la cavazza denton 90% dalla glucosa ord nies saung, normalmein ein quei ca. dus tiarzs. Forsa savess jeu mirar in film da horror enstagl da leger e tremblar e suar ed esser en ina situaziun enorma da stress e barschar quellas 60 calorias? U forsa cun dar 10 minutas badminton u cun ir 6 minutas da scala si.»  

la redacziun da PUNTS