Gist al lieu èn naschids spontanamain insaquants texts e maletgs da simpatisants da las Punts. In giuven tradescha p.ex. co ch’el po gudagnar daners cun far si tendas per auters, duas giuvnas rapportan da lur lavur e tradeschan tge tips da persunas che vegnan la damaun marvegl gia a la bar.

Victoria Mosca sa deditgescha a l’esser single ed inditgescha diesch motivs, pertge ch’igl è meglier da sa render sco persuna na-liada a l’open air.

Flurina Cajochen dat in pitschen sguard sin ils aspects malsanadaivels – ma era sin quels sanadaivels durant l’open air ed Oliver Nyffeler fa ina recensiun da la producziun dad ina gruppa da musica stada preschenta a Degen.  

Pertge? – ina retschertga

La musica è en sasez in dals elements impurtants dad in open air. Pudess ins pensar, ma la musica n’è betg il sulet motiv, pertge che tut quellas massas sa rendan onn per onn a l’Open Air Lumnezia. In’evaluaziun da quels motivs na dastga betg mancar; da leger èn ils resultats da quella retschertga (na-represchentativa) medemamain en las Punts, qua en in pitschen extract:  

«Las entradas per in open air custan ed er ils viadis a quels open airs. Ma quants daners vegnan uschiglio anc sbursads en media durant in festival uschia? 5 persunas na stravagheschan betg e guardan da tegnair lur budget sut 50 francs. Ils blers (12) sa movan en dimensiuns tranter 100 e 200 francs. 5 infurmants dattan ora passa 200 francs, in da quels ha schizunt precisà ed inditgà 400 francs. Pajar va il bler ensemen cun consumar. Nus na vulain betg savair quanta gervosa che vegn bavida (e forsa lura anc far da moralists). Ma en vista a quellas persunas pli u main fittas la sonda, ans interessescha schon anc tge che quellas persunas han bavì sco emprim la sonda damaun – suenter l’emprima saira dad open air.»

la redacziun da PUNTS

La moda e la merda

L’open air è ina chaschun per sa preschentar. Era Silvana Derungs è s’occupada da categorias da persunas e dat ina pitschna survista dals trends da moda da questa stad a l’OAL.  

Insacura è er il pli bel open air a la fin. Quai che resta, n’è dentant savens betg uschè bel. Annatina Dermont dat in’egliada critica sin “Ils culms da merda” ch’èn restads enavos:

«Logic, bittar il palpiri per il plaun vi na fa nagin senn, definitivamain na. E tuttina è l’entir areal d’open air plain merda. Pertge bittas ti tut per terra? È quai be, perquai che ti na stos betg prender si tez tia merda? Era sch’il «dräcksack» è be trais meters sper tai, laschas ti dar il magiel da biera vit giun plaun...!? Igl è insumma ridicul ch’jau survegn mintga giada in nov magiel da plastic tar mia biera. Uschia sai jau per mintga biera era bittar in magiel giun plaun. Cunquai ch’il consum da biera è tenor exactas retschertgas dal team da PUNTS fitg aut, dat quai automaticamain ina massa merda. Che mintga singul na sa betg dismetter sia atgna merda è tragic, trist ed inchapibel, dentant in fenomen da nossa societad.»