Uschia ha Catrina Waldegg vulì savair da Wendelin Balestra da Savognin, tgeninas che èn sias incumbensas sco emploià spezialisà da sanadad en ina chasa d’attempads. Co èsi da lavurar sco um giuven cun la glieud veglia? Co è sia relaziun cun la mort? Co sa senta el en ina professiun dominada plitost da las dunnas?  

Mens sana in corpore sano

Victoria Mosca è sa rendida tar ina cussegliadra da nutriment per survegnir insaquants cussegls per sa nutrir a moda sanadaivla.

Er Angelica Augustin s’occupa da nossas modas da mangiar: cun ils products finids sa limitescha l’act da cuschinar per blers a metter la tschavera en furnel u en l’apparat da micro-undas. Co pon geniturs mussar als uffants l’impurtanza da products frestgs (oravant tut legums e fritgs) ed als transmetter il plaschair da cuschinar?  

Ma tge faschain nus, sch’igl è ina giada tuttina uschè lunsch che nus n’ans sentin betg propi bain? Sche nus avain ina pitschna grippa u in zic mal il chau? Ir tar il medi? Catrina Waldegg è sa messa a la tschertga dals 10 megliers remedis da chasa cunter pitschens malessers: davent da salvgia cunter mal il culiez fin a lindornas nivas cunter mal il magun chattais vus en ses artitgel da tuttas sorts remedis enconuschents e main enconuschents.  

Cassas da malsauns: memia cumplitgà?

Collià cun l’atun è mintg’onn puspè era l’annunzia da las novas premias da las cassas da malsauns. Per blers è quai forsa ina chaussa pauc agreabla, vesend las summas ch’ins ha danovamain da pajar.

La veglia da s’occupar a moda approfundada cun sia cassa da malsauns manca mintgatant – memia cumplitgà. Dasperas dessi qua differentas pussaivladads da spargnar daners. Silvana Derungs dat ina curta survista da quellas pussaivladads e dat er in’invista en la lavur da las cassas da malsauns sezzas: en in discurs cun Roland Vincenz, il manader da fatschenta da la cassa da malsauns vita surselva, intervegn il lectur bain insaquantas chaussas interessantas – ed era tge tenuta ch’ins duess surpigliar en la relaziun cun sia cassa.

la redacziun da PUNTS