L’auto en il Grischun

En noss mintgadi essan nus adina puspè confruntads cun meds da transport. Da quai daventa conscienta era Giuanna Beeli che fa mintga di il viadi da Sagogn a Cuira. Ella sa regorda era dals viadis da scola da pli baud e co quels stuevan esser per ils paupers manischunzs da l’auto da posta.

Ils autos èn er in tema en il text “N’avessans mo betg ans laschà surmanar dal stadi”: in sguard en l’istorgia dals automobils en il Grischun ans mussa che quels vehichels n’èn betg adina stads bainvesids tar nus. In’istorgia plaina da cumbats tranter la populaziun e la regenza grischuna. Adina puspè ha la regenza vulì dar liber tscherts trajects per ils autos, ma il pievel era encunter. L’entira istorgia pudais vus leger sin pagina 5 da l’ediziun actuala.  

Jet lag e visita da l’Australia

Lunsch sur ils autos ora sgolan las soras Nathalie e Stefanie Conrad da Zernez. Ellas lavuran numnadamain omaduas sco flight attendants. En in’intervista cun Victoria Mosca raquintan ellas da lur professiun: da la relaziun cun il temp durant sgular, da las citads lontanas, ils privels, las temas e sa chapescha era davart ils paucs umens en quella professiun.

Braida Pinggera lavura tar la Viafier retica. En las Punts ans raquinta ella dad ina bella sentupada al spurtegl cun ina visita da l’Australia: in um emigrà en l’Australia che viva là da quai ch’el chatta en la natira è vegnì en Svizra per mussar noss pajais a ses figl.  

Jeans sin viadi

Viadis na faschain dentant betg mo nus, mabain era nossa vestgadira fin che nus la purtain. Annatina Dermont ans demonstrescha tge viadis che nossas jeans fan. Lur viadi cumenza cun la mangola da Kasachstan che viagia lura en Tirchia, en il Taiwan ed anc sur pliras destinaziuns fin en Germania. Là, a la sedia da la firma, survegnan las chautschas lura cusì si in cedelin cun l’infurmaziun «Made in Germany». Dapli da quel viadi absurd e davart la glieud che stat davostiers en il text “Globetrotters da stoffa”.

la redacziun da PUNTS