Pilzführer - Definir bulieus cun l’iPhone
Igl è il temp da cleger bulieus. Ma tgenins èn quels ch’ins po mangiar? E quai in chastagnin ni mo in che sumeglia quel? E nua n’ha jau chattà quels chanterels l’onn passà? In’App per l’iPhone sa gidar.
In mo paucas minutas san ’ins definir passa 200 different bulieus ch’èn enconuschents en l’Europa. L’applicaziun differenziescha tranter segns caracteristics sco il moni, chapè ni lamellas u spungias. Diversas fotografias ed ina descripziun detagliada gida a definir pli exact sche quai savess esser propi quel bulieu.
Ma betg mo definir, era marcar tut ils lieus nua ch’ins chatta quels bulieus san ’ins era. Uschè pon ’ins returnar l’onn suenter exact al lieu da chat e mirar sche novs bulieus èn creschids.
Sper la definiziun dals bulieus datti era in quiz che gida ad emprender las pli enconuschentas sorts da bulieus. Cun 9.90 CHF tucca “Pilzführer” plitost tar las Apps che custan relativamain bler. Ma el porscha al main tantas infurmaziuns e maletgs sco in cudesch da bulieus. Quels che na vulan tuttina betg dar ora tants raps, per quels datti era ina versiun “Lite” ch’è gratuita. Ella cuntegna però mo infurmaziuns tar 20 bulieus.
