La concurrenza la «Plema d’aur 2010» è lantschada
Arno Camenisch ha ina - Nadja Scarpatetti era - u lura era Silvio Camenisch. Els tuts han ina «Plema d’aur». Il stilograf cun la plema d’aur datti numnadamain per ils megliers texts che vegnan inoltrads per la concurrenza «Plema d’aur». Quest onn organisescha la Lia Rumantscha questa concurrenza per la 15avla giada. Texts pon ins inoltrar enfin ils 14 da matg.
Dapi onns scrivan era las scolaras ed ils scolars da la Scola cirquitala Surses texts per la concurrenza. Il scolast da rumantsch Bartolome Tscharner animescha onn per onn sias scolaras e ses scolars da scriver in text ed inoltrar quel per la concurrenza. Nus avain vulì savair pertge ch’el fa quai.
Taidla la contribuziun da Gion Hosang...
Tge è la «Plema d’aur» e co funcziuna la concurrenza
La concurrenza da scriver «Plema d’aur» vegn organisada da la Lia Rumantscha. Mintgina e mintgin ch’è pli vegls che set onns po sa participar. Ils texts vegnan parti si en quatter categorias da vegliadetgna. Categoria A: uffants da set enfin nov onns; categoria B: uffants da tranter diesch e dudesch onns; categoria C: giuventetgna tranter 13 e 16 onns e la categoria D: persunas sur 17 onns. Las giuria da las singulas categorias valiteschan ils texts e premiescha ils trais megliers texts da mintga categoria. I dat mintgamai in stilograf. Il stilograf per l’emprim plaz ha ina plima d’aur.
E lura datti anc in’ulteriura categoria. Quella per la meglra pagina d’internet. Quella survegn ina mieur d’aur.
Ils texts e las paginas d’internet èn d’inoltrar enfin ils 14 da matg. Dal text dovri trais copias ed ina versiun electronica sin in disc cumpact. Il text dastga mo cuntegnair il pseudonim. Il vair num, l’adressa, numer da telefon e l’adressa d’internet sto vegnir messa en ina cuverta separada.
L’adressa per inoltrar ils texts è: Lia Rumantscha, Plema d’aur 2010, Via Curtgin pign 35, 7031 Laax.
