Il premi che “Police, adjective” ha survegnì al festival da film a Cannes il 2009 empermetta insatge: Là ha il film survegnì il premi da la giuria en la categoria “Un certain regard”, la categoria cun ils films dad auturs anc pau enconuschents. Ed uschè in autur è il rumen Corneliu Porumboiu. Ma malgrà il premi: Ins na po betg spetgar che Porumboiu daventa uss in star ed anc pli pauc pon ins spetgar che  ses film “Police, adjective” saja in film sco ina bumba.

STEAUA - pleds e scenas interessantas

“Police, adjective” è in film plaun e betg spectacular. I na capita betg bler, il conflict è plitost in intern: Cristi na chatta betg endretg ch’el avess da arrestar ils giuvens kiffer e perquai tira el a la lunga sias retschertgas ed observaziuns. Las scenas en il film èn lungas – durant pliras minutas vegn mussà sco che Cristi stat davant la chasa ch’el observa. Ma tuttina, las scenas lungas han era in avantatg. Sco aspectatura han ins temp da guardar mintga detagl ch’il maletg da la camera mussa. E gista quels detagls mussan fitg bler da la Rumenia. Persunas che van a spass cun chauns, chauns persuls, in plazzal da fabrica, nua ch’i na vegn mai lavurà, fatschadas grischas u ina cun si in graffiti: STEAUA stat là. STEAUA, uschè blers vocals in suenter l’auter...quai datti probabel be en la lingua rumena, uschè ils patratgs che pon ir tras il chau a l’aspectatura.

Tge di il dicziunari?

“Police, adjective” è in film nua che la lingua gioga propi ina rolla. Anca, la dunna da Cristi declera ina giada ina nova regla d’ortografia, in’autra giada las figuras retoricas en ina chanzun da schlagher. Ed era il schef da Cristi ha in’affinitad per la lingua. Uschè culminescha il film en ina scena ch’il schef da Cristi al fa guardar suenter las definiziuns dals pleds “conscienza”, “lescha”, “morala” e “policist” en il dicziunari. E tge di quel dicziunari? La vardad absoluta? Probabel betg, ma il dicziunari schlia il conflict intern da Cristi. El vesa tge ch’el ha da far per esser in bun policist...