Portugal.The Man: Church Mouth
Tge è quai, ina band, che sa numna Portugal.The Man – il pajais l’um? Portugal. The Man, quai n’è però betg mo in um, igl èn trais umens dad Alasca. Nova musica, che vegn or dal nagut e na svanescha betg pli.
Qua vegn insatge nov senza allüras, qua vegnan Portugal.The Man. L’album Church Mouth è gia il segund album da la band dad Alasca, e questa giada va la band sin tura sco headliner, e quai uffizialmain. Tar lur emprima tura en Europa era quai gea anc in pau auter, lur emprim disc “Waiter: You Vultures!” aveva survegnì uschè bunas criticas en Germania, ch’ils organisaturs da concerts en Germania han a curta vista transfurmà il support-act en il headliner...Tge che Portugal.The Man èn vegnids a savair pir sin tribuna...
Ma nagin problem per John Baldwin Gourley (chant, ghitarra), Zachery Scott Carothers (bass, chant) e Jason Wade Sechrist (battaria). Els èn vegnids a frida gia cun tut auters problems, per exempel cun bandunar lur patria Alasca ed ir a Portland per realisar lur siemi, il far musica. La vivevan Gourley e sia glieud l’emprim anc pli u main sin via e concertavan selvadi cun si mascras dad animals. Las mascras èn davent ma las barbas portan ils trais emigrants da l’Alasca anc adina. Umens sco uors, enviern, fraid e naiv – quai è quai ch’ins colliescha cun Alasca. Ed uschè tunan Portugal.The Man, sch’ins metta vitiers anc chapitschas da pellitscha, in fieu da champ da milli grads, in pèr buttiglias cun aua da fieu ed ina ghitarra...
Ensemen cun il chant androgin da Gourley, e la ritmica a la rock vegl dat quai in atmosfera spessa. Musicalmain vegnan Portugal.The Man cumparegliads cun The Mars Volta, ils Blood Brothers, cun influenzas da Radiohead, Led Zeppelin, cun in schuss ghitarras santanescas. Lur stil? In melange da progrock, emo, soul, indie e blues...En il underground american nomn’ins quai era Avant-Indie-Rock. Ma en sasez èsi tuttina, Portugal.The Man fa musica, che stgaffescha in’atmosfera e che resta pitgada, era sch’ins na po dir, ch’els han melodias ch’ins sa imitar suenter paucas secundas, u che lur chanzuns èn hits programmads. Sco cun in crutsch vegnan per exempel “Shade” u “My mind”. Las chanzuns as chavan en il tscharvè e na lascha betg pli liber, sco la regurdanza a la notg, en la naiv, vi dal fieu cun la chapitscha ed il saut e la ghitarra che han stgaudà ...l’enviern en Alasca.
Portugal.The Man en la rait:
