Sepp Blatter, uffants e responsabladad

Ina retschertga tar anteriurs redacturs ed anteriuras redacturas da las PUNTS ha demussà ch’igl è tuttavia pussaivel da far carriera cun las PUNTS – almain ina carriera sco quai che Sepp Blatter ha fatg. U ch’ins emprenda – sco Sursilvan – ch’i dat er a Müstair «classa tips». Tgi che ha fatg tge carriera pudais Vus persequitar en la retschertga “Tge carriera ha fatg...?”.

In’autra retschertga pertutga la carriera futura da PUNTS. En la gasetta sa chatta in curt questiunari per ils lecturs e las lecturas da las PUNTS.

Per la giuventetgna po il tema carriera u il “co vinavant?” esser in tema delicat – oravant tut en discurs da famiglia. Saskia Del Zotto scriva en ses text davart la pressiun dad adina avair in plan precis per il futur.

Dunnas, ormons e «grascha fitsch»

En l’artitgel “Affons, babs, carriera – e mummas che lavuran” s’occupa Silvana Derungs da las pussaivladads da far carriera per mammas qua en Svizra e dat er in sguard en ils pajais dal nord da l’Europa.  
Cun in auter aspect da la carriera sa fatschenta Victoria Mosca: ella descriva cun l’experientscha dal curs da rumantsch co ch’i dat buns Rumantschuns or dals Unterländeruns che avevan uschiglio per moda da dir «grascha fitsch».

Natiralmain ch’i dat anc auters temas interessants, p.ex. la rubrica “Punts politicas” cun il tema botellón, las novas aventuras dals columnists: da la columnista mamma e dal  columnistas che è “ledis sco ina slonda”.

la redacziun da PUNTS