La droga da las dunnas

Chalzers è natiralmain ina tematica per e da las dunnas! Dunnas han stgaffas e stgaffas plain chalzers ed han per mintga blusa in pèr chalzers che van bain a prà. E sa chapescha ch’ils umens na chapeschan er betg tge effects ch’ils chalzers pon avair.
Uschia fa Petra Crameri endament: «Il chaminer cun s-charpas da tach es eir ün’art. Que es ün indschen vaira greiv e per fer üna buna figüra as exercitescha. Las prümas voutas as s-charpluna intuorn scu ün elefant chi ho problems d’equiliber e la probabilited cha’s s-chaluna es magari ota. Ma cul temp as sviluppa üna tecnica ed il chaminer dvainta fich elegant.»  

Chalzers = conflicts?

Chalzers èn puncts da conflict – quai illustreschan divers texts en l’ediziun actuala da las PUNTS. Chalzers chaschunan dentant er insaquants puncts dolurus. Forsa che vus na tractais betg bain avunda voss chalzers e voss pes? Dolurusa è magari era la producziun da chalzers, tgi che ha gugent nauscha conscienza duai leger la curta illustraziun davart las cundiziuns da lavur dals uffants che fabritgeschan noss chalzers en l’India.  

Las PUNTS democraticas  

È quai buna reclama per las PUNTS? Fissi forsa temp da midar insatge vi da la gasetta giuvna? Lura empleni ora il questiunari sin pagina 11 e 12 da la nova ediziun ed al returnai a la redacziun per che quella sappia prender las mesiras necessarias! Grazia fitgun e bun viadi cun buns e bels chalzers e cun l’ediziun da l’october.

la redacziun da PUNTS