Passlung e pasta
- Foto: Beat Deragisch
Trenar, tschairar ils skis e lura partir. Uschè simpel pudessi esser tar ina cursa da passlung. Ma simpel n’èsi betg, i dat in pèr detagls ch’ins ha da resguardar. Detagls culinarics. Quant, tge e cura mangiar èn las dumondas ch’han occupà era a Chatrina Josty avant la cursa da las dunnas.
Teorias
“Jau fiss buna da far quella cursa anc avant ensolver” di mia Mamma cur che nus essan a tschaina cun tschintg autras dunnas da Bravuogn. Mia Mamma discurra da la cursa da las dunnas, per uschè dir il “prolog” dal maraton d’Engiadina: 17 kilometers da Samedan a S-chanf. Avant ensolver! Natiralmain che quai è exagerà sche betg blagà extrem. Ina cursa avant ensolver! Las discussiuns en la runda da dunnas, tuttas passlungistas avant la cursa, han cumenzà.
Spaghettis senza fin
Tge èsi da mangiar avant la cursa? Spaghettis la saira e l’emna avant la cursa è impurtant, baiver bler ed uschia vinavant. Ed al di da la cursa? Era spaghettis, pretenda ina. Quatter uras avant la cursa stuess ins mangiar spaghettis senza sosa. Gea, buna notg! Per la cursa da las dunnas muntass quai: Star si per mangiar spaghettis a las 6.00 - a las 10.00 è numnadamain la partenza.
- Foto: Beat Deragisch
Té empè da spaghettis
Era senza spaghettis cumenza il di da la cursa gia baud. Mia Mamma stat si per far té. Ella cusseglia té. Nus bavain damai té e mangiain tarschola cun mel (il tip da la passlungista la pli sperta da Bravuogn) ed in birchermüesli cun fritgs frestgs (il tip da mai.) Cun stumi plain ed ina banana en il satgados ans mettain nus sin viadi.
- Foto: Beat Deragisch
In sitg avant la partenza
En il tren savuri da Dulix e da gnervusitad da dunnas. Tuttas han gia si chapitscha ed egliers ed èn prontas ed allegras. Arrivadas a la partenza ston tuttas però anc spetgar e co passentan las dunnas il temp da spetg? Clar, cun star en colonna per ir sin tualetta e cun...mangiar! Dapertut ves’ins a svanir balistos e powerriegels en buccas surrientas. In riegel, pertge betg, jau mangel però mo in quart dad in riegel, jau stoss currer a far la gimnastica per stgaudar si. I tanscha mo pli per in sitg da mes té (in recept tut aparti cun doping lubì).
- Foto: Beat Deragisch
- Foto: Beat Deragisch
La partenza
3...2...1...e via! La partenza è il pli difficil, tantas dunnas sin uschè paucs meters quadrats, i dat colonnas. I va in enfin dus kilometers fin che jau ma sai deliberar or da la fulla. Jau hai chaliras! E: Said!
Tar l’emprim post cun bavrondas sun jau però en in tempo uschè flot che jau na vi betg fermar. I sto tanscher fin a La Punt. Là baiv jau quai ch’il voluntari ha numnà “Iistee”. El è chaud. Fa nagut. Ma jau na riv betg da tragutter. Stress! Tut quellas che passan durant che jau baiv, stoss jau suenter puspè prender en.
Jau vom vinavant. Ils pèr kilometers fin a Zuoz giaud jau, els passan spert e qua è puspè il proxim post cun bavrondas e cun bananas.
- Foto: Swissimage.ch
Nauschas bananas
Mhm, bananas? Tge han las dunnas ditg la saira avant? Bananas n’è betg bun. Jau desist ed hai puspè il medem problem cun il té. El ma dat però tanta forza che jau riv da surpassar in pèr da mias concurrentas gia sin il prim toc stip vers S-chanf. Jau guard sin l’ura. Super! Sche jau dun gas sun jau en var 15 minutas en l’arrivada. Jau pens a mes “Rotebäckchensaft” che spetga en mes satgados a S-chanf e dun gas.
- Foto: TVR
Party da macaruns
In’ura pli tard, suenter il sguard sin la rangaziun e suenter il sa stgamiar tranter ils camiuns cun la bagascha, ses jau sin in banc avant la tenda da festa e baiv mes “Rotebäckchensaft”. Massellas cotschnas hai jau zuar gia ma il saft cuntegna bler fier e quai è bun per dunnas. Las dunnas passan en ed or da la tenda (nua ch’i dat macaruns e rivella), i vegn gratulà e branclà e calculà: Quantas minutas pli spert avess ’ins pudì esser sche la partenza fiss stada meglra? Quant temp avess’ins spargnà cun desister dal té al post da bavrondas? Fiss’ins stà pli svelt sch’ins avess mangià spaghettis bluts la damaun las 6.00?
U è tut il teater cun il mangiar mo in tamtam senza senn ed ins faschess la cursa senza problems anc avant ensolver? Hm...dumondas difficilas.
I vala mo il test da tut las variantas.
Fotogalaria da la cursa da las dunnas
- swissimage.ch
