Horror sin l'insla
Teddy Daniels (Leonardo di Caprio) vegn incumbensà ils onns 50 dad ir sin “Shutter Island” ad intercurir in cas misterius. Ina mordra disturbada è scappada misteriusamain or da la clinica psichiatrica da l’insla. Ma empè da sclerir il cas glischna Daniels sez en il horror da la clinica – morders, psychos e ses traumas il persequiteschan. Cumport’ins quest film?
Tadlar la critica da Chatrina Josty...
Per quai vai:
Tge è vaira, tge illusiun e tge trauma? En “Shutter Island” vai per quellas dumondas ed era per la dumonda quant violent che l’uman sa esser.
Quai va bain:
“Shutter Island” è tensiun totala da l’emprima minuta enfin l’ultima, la fin surprendenta, l’istorgia sco tala geniala.
Quai na va betg bain:
Teddy Daniels, il protagonist dal film è stà en la segunda guerra mundiala. El è stà da la partida cur ch’ils Americans han deliberà il champ da concentraziun Dachau. Ils maletgs da las baras cumparan adina puspè en la memoria da Daniels ed uschia era en quest film. Quai vegn crititgà (per exempel dal publicist franzos Bernard-Henri Lévy) sco fitg dispitaivel – cun raschun. Quellas scenas laschan enavos in curius sentiment, ellas èn stratgas ora da lur context istoric e plazzadas qua en in psychothriller...Quai na va betg bain.
LA frasa dal film:
Ti na vegns mai a bandunar quest’insla!
Il u LA actura dal film:
Leonardo di Caprio. El è da vesair en mintga scena, dal pokerface al psycho, el mussa tut.
