Sleep Cycle alarm clock - Ir a letg cun l’iPhone
Tgi ch’ha in iPhone sa quai: per mintga situaziun en la vita datti ina applicaziun. Prest per mintg’ina. Sch’ins ha in problem, lura pon ins guardar curt en l’Apple Store e curt suenter han ins chattà ina soluziun. Era per quels che na pon betg levar la damaun datti ina.
Tgi n’enconuscha betg quai. Il svegliarin scalina la bun’ura ed il pli gugent tirass ins quai smaledì apparat cunter la paraid e durmiss enavant. Tar mai è quai en mintga cas uschia. Jau hai adina il sentiment ch’il svegliarin scalina adina gist lura cura che jau dorma il meglier. Emporta nagut, sch’igl è baud u tard.
L’iPhone ha la soluziun
La soluziun fiss forsa in svegliarin che dasda mai tenor mes ritmus da durmir. Mo quels custan var 300 francs. E qua è definitiv memia bler. Cunzunt cunquai che jau, na sun betg uschè persvas che quai funcziuna. E perquai vom jau a la tschertga d’in autra soluziun. E co pudessi esser: chattà hai jau quella en mes iPhone. Per 1.10 francs datti l’applicaziun “Sleep Cycle” che dasda tenor las fasas da durmir. Quai stos jau simplamain testar.
El sa cura co che jau dorma
La funcziun è tant tar l’iPhone sco er tar il svegliarin che dasda tenor las fasas da durmir la medema. Entant ch’il svegliarin ha in sensur ch’ins metta per il pli enturn il bratsch sco in bratschlet, datti tar l’iPhone sensurs che pon medemamain mesirar il moviment. Els pon mesirar il moviment da l’iPhone. Pia ston ins ir en letg cun l’iPhone. Tuna curius, è dentant uschia.
Il test
Dapi intgins dis test jau quest’applicaziun. Mintga saira cura che jau vom a letg prend jau cun mai mes iPhone, definesch il temp cura che jau vi sin il pli tard levar e plazzescha quel cun il display engiu sin la matratscha sper il plimatsch.
L’autra damaun 20 avant las sis hai jau il sentiment che jau audia ina melodia che jau na pos betg definir danunder ch’ella vegn. E lura, ach gea, mes iPhone. Jau testa gia quell’applicaziun. Mes emprim patratg: pos jau ussa levar pli tgunsch? Hmm, atgnamain sco adina... Jau guarda la statistica. Quella è prest il pli interessant. I para ch’jau hai duas giadas la notg betg durmì uschè stagn. Mo jau na dun betg si.
Il facit
Suenter ulteriurs dis crai jau definitiv ch’i va in pau pli tgunsch da levar lura cura ch’ins na dorma betg uschè stagn. Per cumprar in svegliarin da 300 francs na persvadi lura tuttina betg. L’applicaziun “Sleep Cycle” funcziuna vairamain. Almain vegn jau alerta tgunsch. Pertge in punct ch’è insumma betg bun è las melodias ch’ins po tscherner per laschar as dasdar. Quellas èn plitost da sa durmentar e betg propi dad aut. Ins auda strusch ellas. Jau hai mai savì, quant ditg ch’i sunava gia. Ma jau sun vegnì alerta - quai che munta che jau na durmiva betg ferm en quai mument.
Insatge che n’è era betg uschè grategià è, che l’iPhone dovra pulit bler accu. Il meglier è da chargiar cumplain l’accu avant ch’ir a letg (sch’ins na vul betg cabels per il letg enturn...) e lura tanscha quai anc flot per lavurar cun l’iPhone il di suenter.
Jau hai decidì d'ir enavant a letg cun l'iPhone - almain per il mument. E tgisà, forsa daventa quai vairamain mia metoda per rivar tgunsch or da letg la bun'ura.
