La stagiun dad Open Airs da MC Orange

Cumenzà ha tut cun igl Open Air Soundcheck a Lucerna, nua ch’jau hai concertà cun OBK il venderdi saira. Sco entschatta da la stagiun dils Open Airs, in bun festival per mirar co la musica da OBK vegn insumma vi tar la glieud. Tut è pli u main gartegià, ed il feedback n’era betg mal.

Pia eran nus, jau, pront per ils festivals 2008, e plaun a plaun è era l’ emprim Open Air pli grond stà davant porta. L’Open Air a Son Gagl, nua ch’jau sun stà cun las Liricas Analas e betg cun OBK sin tribuna. Nos sulet concert da la stad 2008. Mo in concert sin quel che nus avain sa legrads fitg.

Trenar e spetgar sin Son Gagl

Suenter avair trenà sco gronds las davosas emnas avant il concert, n'avain nus strusch pli pudì spetgar enfin ch’i era uschè lunsch. Il meglier da quell’entira chaussa: Las Liricas Analas sunan la sonda notg da las trais enfin a las quatter da la damaun. Pia sco davosa band dal program da la sonda, e quai gist anc suenter il concert da Deichkind da la Germania. Per nus tuts ina sfida ed in test per preschentar las novas chanzuns.

Gia arrivà il venderdi saira al Open Air Son Gagl, sco sulet da las Liricas, hai jau fatg in pau festa e giudì il concert da Justice. Ina notg en tenda, e lura eri uschè lunsch, il di dal concert. Pau a Pau è lura vegnì era il rest da la gruppa la sonda suentermezdi, ed uschè essan nus sa mess sin via direcziun backstage per tschertgar noss  container. Igl era circa las trais il suentermezdi, pia anc 12 uras spetgar enfin ch’il  concert cumenzia. Mo tge far quellas 12 uras? Baiver enturn? Na, gliez sco pli davos. Star enturn, dar intervistas, baiver aua e giudair l’atmosfera dal Open Air. Tge chaliras!

11 uras pli tard  

Suenter avair guardà il concert da Deichkind, in concert extrem bun, essan nus s’entupads en il backstage. Tge gnervusitad! La tenda nua che nus avevan da sunar era anc adina fullanada, sche gie ch’i era gia passà las duas da la notg e Deichkind aveva dà tut. Mo la glieud na pareva betg dad avair avunda e spetgava sin nus, las Liricas Analas. Tge vulain dir rodund 4000 persunas. Betg ch’ins n’avess anc mai gì sunà avant tant public, mo sunar sco davosa band la sonda notg al Open Air Son Gagl, è segiramain in’onur per nus tuts.
Suenter esser sa midads en noss outfit ed avair discussiunà la setlist, essan nus ids davos tribuna. Il chau è clar, uss è baiver ina gervosa il meglier ch’ins sa far. Viva!  
Anc spert far in per patratgs, giavischar buna fortuna in a l’auter ed in handshake, e nus essan pinads. L’intro cumenza ed il public sa dasda danovamain.  

Duas emnas pli tard

Puspè in grond di. OBK suna al Open Air Frauenfeld il venderdi suentermezdi. Gia l’onn passà hai jau pudì star sin quella tribuna e quai cun las Liricas Analas. Uschè che jau saveva tge che spetgava mai. Jau astgava sa legrar. Nus essan sa chattads venderdi a las 11.00 uras a Cuira sin il Arcas ed essan partids encunter Frauenfeld. Arrivads a Frauenfeld, avain nus prendì nossa rauba ord dals dus autos ed essan sco adina ids en il backstage. Per mai il pli bel backstage da tut ils Open Airs.  

Mintgin da nus sesa sin ina sutga e giauda il sulegl cun ina gervosa enten pugn. Tgi discurra, tgi ri e tgi taidla mo tiers. L’atmosfera è fitg lucca e pau a pau s’emplenescha il backstage cun glieud da las autras bands. Era blers amis da nus sco per exempel la Chlyklass da Berna cun Greis a Baze, ils tips da Breitbild, Sektion Kuchikäschtli ed ina massa auters.

Era preschenta è ina fitg bella dunna. Ina che fa mai stress! Daco? Perquai ch’ella va cun Stress. Pia èsi nagin’autra che Melanie Winiger, per l’emprima giada live davant mai. Tge daletg. La Melanie Winiger en ina blusa alva ed in per Jeans blauas, simpel dentond “oho”. Tge postura e tge fatscha, OBK era sco ipnotisà. Mo lain uss quest tema.  

Il schef n'era betg cuntent

Il concert da OBK vegniva pli e pli datiers ed uschè era la gnervusitad. Sche quella n’è betg d’enturn, n’è insatge betg bun. Ella sto esser, era sch’ins sa ch’i vegn bun e che nagut sa ir en las chautschas. Quai che va giu en il backstage avant il concert è pli u main adina il medem. Sa midar, discussiunar la setlist e sa metter sin via direcziun tribuna. OBK è la quarta gruppa dal venderdi gist avant Culcha Candela. Tuts en nair cun noss costums da jodladers spetgain nus per cumenzar. Era qua è la tenda emplenida bain, dentond strusch uschè plaina sco l’onn passà. Fa nagut, nus dain tut.    

Era sche nus avain dà tut, per noss schef Gimma n’è il concert betg stà bun, per il rest dentond schon. Pitschens sbagls ed in u l’auter incap, quai sa schabegiar. I avess segir pudì esser meglier, gliez poi adina, mo nus pudevan esser cuntents.

Grazia fitg!

Sco adina a da quels Open Airs, cumenza suenter il concert la gronda party. Alcohol en abundanza e quai enfin la damaun baud. Jau hai durmì ina mes’ura en il backstage e silsuenter essan nus puspè partids vers chasa. Là hai jau durmì davent da las 11.00 enfin las 19.00 uras en mes agen letg, e silsuenter sa fatgs sin via cun OBK agl Open Air Trun. Là avain nus sunà sco act principal ed medemamain pudì giudair in concert fitg bun cun in public fitg engraziaivel ed in’atmosfera fitg empernaivla. Quai è stada ina fitg bella e fitg bletscha notg.

Sper anc auters pli pitschens Open Airs, èn l Open Air Sogn Gagl e quel a Frauenfeld segiramain stads ils highlights. A mai hai dentond plaschì dapertut. Perquai resti mo pli da dir: „Grazia fitg a vus, il public e natiralmain a tut ils organisaturs, e sin in sa vesair l’onn che vegn.“