Surpraisas tar la surdada dal Quartz

Tar la sudada dal Quartz la sonda passada hai dà inqual surpraisa. Il film “Giulias Verschwinden” ch'era nominà per tschintg Quartz n’ha survegnì insumma nagin. Sco meglier film è il film “Coeur animal” vegnì onurà.

Giulia è svanida
Il premi per il meglier film svizzer è vegnì surdà dal minister da cultura Didier Burkhalter. Suenter che Susanne Kunz ha fatg in pau embrugl cun il prenum dal cusseglier federal ha quel lura mo manegià, ch’el stoppia sco quai ch’i pari anc vegnir intginas giadas a la surdada dal Quartz, per che Kunz tegnia endament ses num. Vinavant ha el lura era tradì ch’el haja vis tant il film “Giulias Verschwinden” sco era il film nominà “Coeur animal”. Sco minister da cultura stoppia el gea esser orientà tge che curra a passa tar il film svizzer. Il cristal ha el lura la finala dastgà surdar a la reschissura da la Svizra romanda Séverine Cornamusaz per ses film “Coeur animal”. Per il favurit “Giulias Verschwinden”, ch’è stà l’onn 2009 il film cun il pli grond success, hai dà nagins Quartz. Quai malgrà ch’il film è stà nominà en tschintg categorias.

Surpraisas er tar la meglra actura ed il meglier actur
Era il meglier actur ha giugà en il film “Coeur animal”. Il spagnol Antonio Buil ha survegnì il Quartz per sia rolla sco famegl ch'ha survegnì ina plazza tar in pur brutal. Medemamain nominads eran ils favurits Roeland Wiesnekker (“Der Fürsorger”) e Bruno Ganz (“Giulias Verschwinden”).

Marie Leuenberger ha dastgà prender encunter la trofea dal Quartz per sia emprima rolla da film. La basilaisa ch’è naschida l’onn 1980 aveva enfin ussa mo giugà teater. Leuenberger è vegnida onurada per sia rolla en il film “Die Standesbeamtin” nua ch’ella ha era gist giugà quella. Senza trofea han Melanie Winiger (“Sinestesia”)  sco era Sunnyi Melles (“Giulias Verschwinden”) stuì ir a chasa.