Davart Bryan, Marie e Tarzan
Manuela è redactura da battaporta: planisar, scriver, filmar, moderar, registrar, fotografar e tagliar. Quai è dentant tut mo fatschada. Atgnamein lavura Manuela en il zuppà per il servetsch secret, quai era d’uffant sia professiun da siemi. In siemi da Manuela è era da chantar in duet cun Bryan Adams u cun in auter rocker. Sias davosas 24 uras na passentass la giuvna spiuna - ah, perdunai - redactura dentant betg cun Bryan. Na, ella faschess ina festa cun la famiglia e cun collegas per suenter pudair sa durmentar paschaivlamain. Sco bun agid da sa durmentar ha Manuela sin maisa da notg biografias u ch’ella legia romans da dieus selvadis.
Daniela è redactura. E tar Battaporta è quai ina lavur fitg variada che pretenda bler. Per puspè pudair sa quietar da quest travasch dal mintgadi, siemia Daniela gugent da registrar in album cun Robert Plant. In auter siemi è da giugar la rolla principala en il film Marie Antoinette e d’abitar en il chastè da Versailles e sa vestgir cun costums pompus. Mo ina princessa na vuleva Daniela mai esser. En realitad fiss ella gugent daventada fotografa per il National Geographic. Mo quai ha peda. L'emprim vegn il Battaporta.
Gion è producent multimedia. Quai vul dir ch’el fa in pau dal tut. Ed en quest dal tut tutga era il battaporta. Qua coordinescha el las lavurs, è responsabel per il cuntegn da la pagina d’internet, e sche la redacziun vegn en las stretgas, alura gida el las redacturas. Mo senza café va nagut tar Gion. La dumonda té u café na datti betg per Gion. Té è bain insatge per malsauns. Sche Gion na fiss betg daventà producent multimedia, alur avess el fatg carriera en la scena da musical. Sche pussaivel en la rolla dal Tarzan. In Tarzan cun numer da chalzers 41.
